Almaty oblysynyń úsh turǵyny qyzdy alyp qashqany úshin sottaldy
TARAZ. KAZINFORM — Ótken jyldyń qazan aıynda Taraz qalasynda Almaty oblysynyń úsh turǵyny Jambyl oblysynyń 19 jastaǵy turǵynyn nekege turýǵa májbúrleý maqsatynda alyp qashqan.
Atalǵan fakti boıynsha Taraz qalasy Áýlıeata aýdanynyń polıtsııa bólimi QRQK-niń 125-1-baby 2-bóliginiń 1) jáne 4) tarmaqtary boıynsha sotqa deıingi tergep-tekserýdi bastaǵan.
— Tergeý barysynda jábirlenýshiniń bes jyldan astam ýaqyt boıy alyp qashýdy uıymdastyrǵan azamatpen jaqyn qarym-qatynasta bolǵany, alaıda oǵan turmysqa shyǵýdan bas tartqany anyqtaldy. Qyzdyń birneshe márte bas tartýyna qaramastan, er adam ony alyp qashýdy uıymdastyrýǵa sheshim qabyldap, qylmysty jasaýǵa tanystaryn tartqan. Osylaısha, aldyn ala sóz baılasqan adamdar toby bolyp áreket etken úsh kúdikti kúsh qoldanyp, kúndizgi ýaqytta jábirlenýshini alyp ketken, — delingen habarlamada.
Sot talqylaýy barysynda aıyptalýshylardyń kinási tolyq dáleldendi. Taraz qalasynyń № 2 sotynyń 4 mamyrdaǵy úkimi boıynsha olar adamdy nekege turýǵa májbúrleý maqsatynda alyp qashqany úshin kináli dep tanyldy.
Qylmystyq kodektiń 63-baby qoldanylyp, úsh sottalýshynyń árqaısysyna úsh jyl merzimge bas bostandyǵynan aıyrý jazasy taǵaıyndaldy.
Úkim zańdy kúshine endi.
Qyz alyp qashý romantıka emes, advokat jańa zańnyń mańyzy týraly aıtqan edi.
