Almaty oblysynyń turǵyndary jaıylym men sý máselesin kóterdi
Májilis depýtaty Danııar Qasqaraýov Almaty oblysy Jambyl aýdanynyń turǵyndarymen kezdesti. Óńirdiń problemalaryn talqylaýǵa aýyl ákimderi, máslıhat depýtattary, qoǵamdyq uıymdardyń ókilderi men jergilikti turǵyndar qatysty, dep habarlaıdy Kazinform.
Jıynda Jambyl aýdanyndaǵy basym sala aýylsharýashylyǵy bolǵandyqtan, tórt túliktiń jem-shóbi men jaıylymy týraly, sondaı-aq egin alqaptaryn sýǵarýǵa baılanysty ózekti suraqtar talqylandy. Mundaǵy sýarý júıeleriniń tozyǵy jetkendikten tasymaldaý kezinde sýdyń 80%-y joǵalady. Osyǵan baılanysty aýdandaǵy sý júıelerin qalpyna keltirý úshin jergilikti jáne respýblıkalyq bıýdjetten 28 mlrd teńge qarastyrylyp, onyń bıyl 1 mlrd teńgesi bólingen.
Júzdesý barysynda aýyl halqyn tolǵandyryp júrgen taza aýyz sýmen qamtamasyz etý, mektepke arnalǵan qosymsha ǵımarattyń qurylys jumysy, qańǵybas ıtterge qatysty kóptegen másele kóterilip, depýtat naqty suraqtarǵa jaýap berdi.
Kezdesýden keıin Danııar Qasqaraýov Uzynaǵash aýylyndaǵy 1 500 balaǵa arnalǵan memlekettik-jekemenshik áriptestik negizinde boı kótergen jańa mekteptiń jumysymen tanysty. Bul bilim oshaǵy zamanaýı quraldarmen jabdyqtalyp, oqýshylardyń bilim alýyna barlyq jaǵdaı jasalǵan.
Aldaǵy eki jylda Jambyl aýdanynda osyndaı 8 mektep salý josparlanyp otyr.
