Almaty oblysynyń tórt turǵynynan sibir jarasy anyqtaldy
QONAEV. KAZINFORM - Almaty oblysy Uıǵyr aýdanyna qarasty Úlken Aqsý aýyldyq okrýginde sibir jarasyna kúdikti tórt jaǵdaı tirkeldi. Bul týraly oblystyq sanıtarııalyq-epıdemıologııalyq baqylaý departamenti málim etti.
Almaty oblysy densaýlyq saqtaý basqarmasynyń basshysy Almat Turysbekuly aýrýdyń teri túri ınfektsııanyń eń keń taralǵan túri ekenin jáne ýaqtyly emdeý kezinde qalpyna kelý múmkindiginiń joǵary ekenin atap ótti.
Barlyq patsıentterdiń jaǵdaıy aýyrlyqtyń ortasha dárejesinde dep baǵalanýda.
«Sibir jarasy adamnan adamǵa juqpaıdy. Infektsııanyń negizgi kózi – iri qara mal, jylqy, qoı, eshki. Sibir jarasynyń qozdyrǵyshy adam organızmine, negizinen, zaqymdalǵan teri arqyly, sırek jaǵdaıda – tynys alý joldary men asqazan-ishek joldarynyń shyryshty qabattary arqyly enedi. Inkýbatsııalyq kezeń (juqtyrý sátinen bastap aýrýdyń belgileri paıda bolǵanǵa deıingi ýaqyt) 2 kúnnen 14 kúnge deıin», - dedi ol.
Almaty oblysynyń sanıtarııalyq-epıdemıologııalyq baqylaý departamentiniń basshysy Marat Ismaılov ınfektsııany juqtyrý qaýpi bar adamdar toby anyqtalǵanyn aıtty. Olardyń barlyǵy medıtsınalyq baqylaýǵa alynǵan.
Jergilikti atqarýshy organdar jedel shtab quryp, jaǵdaıdy baqylaýdy jáne qadaǵalaýdy kúsheıtti. Aýdandyq polıtsııa bólimi etti jáne maldy aýdannan tys jerlerge áketýge jáne basqa aýdandardan ákelýge shekteý engizdi.
Qazaqstan Respýblıkasy Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Almaty oblysy boıynsha aýmaqtyq ınspektsııasynan atap ótkendeı, mal veterınarlyq qyzmetke habarlamastan soıylǵan.
«Aýrýdyń naqty sebepterin anyqtaý úshin veterınarııalyq ınspektsııa sanıtarııalyq-epıdemıologııalyq baqylaý jáne polıtsııa departamentimen jáne oblys ákimdigimen birlesip naýqastardyń úılerinen soıylǵan maldyń shıkizaty men ónimderinen, sondaı-aq soıý ornyndaǵy topyraqtan synamalar aldy.Bakterıologııalyq zertteýlerdiń nátıjeleri jaqyn arada daıyn bolady dep kútilýde. Sonymen qatar, taldaý úshin materıaldar Almaty qalasyndaǵy veterınarııa jónindegi ulttyq referenttik ortalyqqa jiberildi»,- delingen habarlamada.
Qazirgi ýaqytta eldimekende dezınfektsııalaý jumystary júrgizildi, naýqastardyń jeke sharýashylyqtary karantınge jabyldy.
Mamandar janýarlardy kúndelikti tekserýden ótkizýde, ázirge aýrýdyń klınıkalyq belgileri anyqtalǵan joq.
