Almaty oblysynyń taýlarynda taǵy da qurǵaq shóp órtenip jatyr
ALMATY. KAZINFORM — Almaty oblysynyń Qarasaı aýdanynda, Dolan aýyly mańyndaǵy taýly aýmaqta qurǵaq shóp pen butalardyń órtengeni týraly aqparat tirkeldi. Bul týraly QR Tótenshe jaǵdaılar mınıstrligine málimdedi.
Órtti sóndirýge Almaty oblysy men Almaty qalasynyń TJD-niń, Іle-Alataý ulttyq tabıǵı parki qyzmetiniń, jergilikti atqarýshy organdardyń jáne QR TJM-niń 28237 áskerı bóliminiń 100-den astam qyzmetkeri men 20 tehnıka birligi jumyldyryldy.
«Qazavıaqutqarý» AQ-nyń tikushaǵy sý tógý qurylǵysy arqyly áýeden sý shashýda.
TJM málimetinshe, órtti sóndirý jumystary tik taýly jer bederi, órt aýmaǵyna aparatyn joldardyń bolmaýy, shóptiń qalyńdyǵy men butalardyń kóptigi saldarynan qıyndatylǵan.
Eske salaıyq, ótken aptada Almaty oblysyndaǵy Orta Kyrgaýyldy shatqalynda shamamen 8 gektar aýmaqta qurǵaq shóp órtengen bolatyn. Jaǵdaı TJM tolyq baqylaýynda bolǵan.
Sondaı-aq qutqarýshylar Aqsaı shatqalynda da qurǵaq shóptiń janýyn sóndirdi. Órtti sóndirýge QR TJM «Qazavıaqutqarý» AQ-nan sý tógetin qurylǵysy bar Mı-8 tikushaǵy tartylǵan.
Aldyn ala málimet boıynsha, órttiń aýmaǵy 5 gektardy qurady. Qaza tapqandar men zardap shekkender joq. Órt saldarynan 6 qurylys zaqymdanǵan, olardyń ishinde 35 sharshy metrlik 2 saıajaı úıi, 21 sharshy metrdi quraıtyn 3 bastyrma jáne 20 sharshy metrlik monsha bar.