Almaty oblysynyń taýlarynda máıit tabyldy: alpınıst 19 jyl buryn joǵalǵan
QONAEV. KAZINFORM — Almaty oblysynyń taýlarynda tabylǵan alpınıstiń 19 jyl buryn joǵalyp ketkeni belgili boldy.
Buǵan deıin sheteldik týrıster Almaty oblysynyń Talǵar aýdanynda, Severtsov muzdyǵy mańynda teńiz deńgeıinen 3400 metrge jýyq bıiktikte belgisiz adamnyń máıitin tapqan bolatyn. Olar bul týraly Tótenshe jaǵdaılar mınıstrligine habarlaǵan.
Aqparat túsken soń QR TJM qutqarýshylary oqıǵa ornyna jetip, máıitti qatynaýǵa qıyn taýly aýmaqtan evakýatsııalady. Máıitti tómenge jetkizý úshin «Qazáýequtqarý» tikushaǵy tartyldy.
Oqıǵa týraly áleýmettik jelide Almaty turǵyny Anastasııa Ahmetova jazyp, qaza tapqan alpınıst jabdyqtarynyń fotosýretterin jarııalaǵan edi. Bul jazba boıynsha oǵan kóp ýaqyt buryn joǵalǵan azamattyń qyzy Nellıa Mıheeva habarlasqan. Ol sýrettegi sómkeni ákesiniń dorbasyna uqsatqan. Onyń aıtýynsha, ákesi 2007 jyly joǵalyp ketken.
— Arada 19 jyl ótkende ákemniń súıekteri tabyldy. Tańerteń qurbym bizdiń joldorbaǵa óte uqsas sómkeniń sýreti bar habarlamany jiberdi. Keıin bul jazbany kúıeýim de jiberdi. Men TJM ókilderine habarlastym, olar maǵan máıitti tómen túsirgen qutqarýshynyń jáne tergeýshiniń telefon nómirin berdi. Tergeýshi barlyq sýretter men qujattardy jiberýdi surady. Keıin qaıta habarlasyp, joldorbanyń ishinen ákemniń atyna jazylǵan kýálik tabylǵanyn aıtty, — dedi Nellıa Mıheeva.
Eske salaıyq, Almaty qutqarýshylary qaýipti taý baǵyttaryn atady.
