Almaty oblysynyń taýlarynda biraz ýaqyt jatqan máıit tabyldy
QONAEV. KAZINFORM — Almaty oblysynyń Talǵar aýdanyndaǵy Severtsov muzdyǵynda týrıster toby adam máıitin anyqtady.
Oqıǵa týraly áleýmettik jeli qoldanýshysy jazdy.
— 16 tamyzda meniń belarýs dostarym bizdiń taýlardaǵy eki aptalyq saıahattan keıin tómenge túsip, Severtsov muzdyǵynan adam súıekterin tapqanyn aıtyp, beınejazbasyn jiberdi. Biz birden 109 qyzmetine habarlastyq jáne berilgen nómirge mekenjaı, foto men vıdeony jiberdik, — dep jazdy ol áleýmettik jelide.
Dese de, ol adam máıitin evakýatsııalaý máselesi áli sheshilmeı otyrǵanyn málimdedi. Bul jaǵdaıǵa qatysty Almatynyń tótenshe jaǵdaılar departamenti pikir bildirdi.
— Bul ótinish óńdeýge qabyldady. Qazirgi ýaqytta aqparat naqtylanyp jatyr. Bekitilgen protsedýralardy eskere otyryp, odan arǵy is-qımyldar tártibi polıtsııa qyzmetkerlerimen kelisiledi. Sonyń ishinde oqıǵa ornyna shyǵý, tekserý júrgizý jáne tıisti derekqorlardy tekserý máseleleri qamtylady, — dep habarlady tótenshe jaǵdaılar deparatamenti.
Sonymen qatar barlyq mán-jaı anyqtalyp, jaǵdaı baǵalanǵan soń, odan keıingi is-qımyldar týraly sheshim qabyldanatyny habarlandy.
Eske salaıyq, buǵan deıin Almaty qutqarýshylary qaýipti taý baǵyttaryn atady.
