Almaty oblysynyń taǵy bir aýdanynda sheteldikterge arnalǵan kazıno aımaǵy ashylady
QONAEV. KAZINFORM – Almaty oblysynda ornalasqan oıyn bıznesiniń ókilderi bıyl qansha salyq tólegeni belgili boldy.
Oblys ákimdiginiń málimetinshe, óńirdegi zańdy oıyn bıznesi sýbektilerinen 6 aı ishinde memlekettik bıýdjetke 25 mlrd teńge salyq túsken. Onyń 10,6 mlrd teńgesi óńirlik bıýdjetke aýdarylǵan. Al 2,5 jylda saladan memlekettik bıýdjetke jalpy 184,7 mlrd teńge salyq túsken.
Jalpy Qonaev qalasynda oıyn bıznesi salasynda 21 nysan jumys isteıdi. Onyń ishinde 5 kazıno, 13 býkmekerlik keńse jáne 3 oıyn avtomattary zaly bar. Salada shamamen 2,5 myń adam eńbek etedi.
- Oıyn bıznesi aımaqtyń týrızmine de oń áser etip otyr. Óńirdegi kazınolarǵa kelýshilerdiń shamamen 20 paıyzy – shetel azamattary, - dep habarlady oblystyq týrızm basqarmasynan.
Jańa kazıno aımaǵy qurylady
Sondaı-aq Almaty oblysynyń ákimdigi qoldanystaǵy «Oıyn bıznesi týraly» zań aıasynda Talǵar aýdanynda tek shetel azamattaryna arnalǵan jańa oıyn aımaǵyn qurý josparlanyp otyrǵanyn málimdedi. Bul bastama qoǵamdyq keńeste qaralyp, oń qorytyndy alǵan.
- Talǵar aýdany týrıstik ınfraqurylymy qalyptasqan aımaqtardyń biri. Munda «Aqbulaq» sporttyq-saýyqtyrý kesheni, «Oi-Qaragai» taý-shańǵy kýrorty, Aquaasia Resort jáne Tal Resort demalys kesheni sııaqty tanymal týrıstik nysandar bar. Sondyqtan jańa aımaqty óńirdiń týrıstik ekojúıesiniń bir bóligi retinde damytý kózdelip otyr. Bul týrısterge usynylatyn qyzmet túrlerin ártaraptandyryp, servıstik ınfraqurylymnyń damýyna qosymsha múmkindik beredi, – dedi Almaty oblysy Týrızm basqarmasynyń basshysy Qýanyshbek Mırambekuly.
Eske salaıyq, Qazaqstanda tek sheteldikterge ǵana arnalǵan kazınolar qashan ashylatynyn jazǵanbyz.
