Almaty oblysynyń sý aıdyndaryndaǵy jaǵdaı baqylaýda – Marat Sultanǵazıev
QONAEV. KAZINFORM - 30 naýryzda Іle aýdany Baıkent aýylyndaǵy «Voroshılov» sý qoımasynyń bógeti jaryldy.
Jarylǵan jerdiń eni shamamen 5 metr. Osyǵan oraı aımaq basshysy Marat Sultanǵazıev apatqa qarsy kúres boıynsha qabyldanǵan sharalar týraly baıandady.
«Sý qoımasyndaǵy 700 myń tekshe metr sý kólemin eskere otyryp, turǵyn úı sektoryn sý basýǵa jol bermeý boıynsha jumystar júrgizildi. «Jarmuhamet» ózeniniń negizgi arnasy boıynsha sý aǵynyn «Amangeldi 1» jáne «Amangeldi 2» toǵandaryna, sodan keıin Qaskeleń ózeni arqyly Qapshaǵaı sý qoımasyna baǵyttaý úshin barlyq qajetti sharalar qabyldandy. Saldaryn jeńildetý úshin Qaraoı aýylyndaǵy «Ýtıankı» kólinen sý aǵyzyldy», - dedi Marat Sultanǵazıev.
Barlyǵy 17 adam evakýatsııalandy. Qaýipke baılanysty ózen aǵysyn kedergilerden tazartyp, Amangeldi toǵanynyń jaǵalaýyn nyǵaıtý jumystary júrgizildi. Bul sharalar turǵyndardy qorǵaýǵa jáne sý tasqynyna yqtımal apattardyń aldyn alýǵa baǵyttalǵan. Bul mindetti iske asyrý úshin aıtarlyqtaı resýrstar tartyldy: qorǵanys qurylystaryn nyǵaıtý jáne jaǵalaý boıynyń qaýipsizdigin qamtamasyz etý úshin 1200 tonna ınertti materıal jetkizildi. Sondaı-aq tıimdi nyǵaıtý jáne qorǵaý úshin ınertti materıaly bar 4000 qapshyq tóseldi.
Aımaq halqy ózderiniń birligin kórsetti. Eriktiler men uıymdar, onyń ishinde «Jaqsylyq sáýlesi» jáne «Amelı qory» azyq-túlikpen qamtamasyz etti jáne olardy taratýǵa kómektesti. Jergilikti turǵyndar, onyń ishinde áıelder men qyzdar ystyq tamaq daıyndady. Al «Dám fabrıkasy» ystyq taǵamdar jetkizdi.
Jergilikti turǵyndar arasynan shyqqan erler men jas jigitter qumdy qaptarǵa salyp, qorshaýlar ornatýmen belsendi aınalysty. Іle aýdanynyń jastar ortalyǵy da azyq-túlik taratýǵa jáne qumdy oraýǵa úles qosty.
«Barlyq qyzmetterdiń jedel reaktsııasy men shtabty tıimdi uıymdastyrýdyń arqasynda qabyldanǵan sheshimder qaza tapqandar men múliktiń joǵalýyn boldyrmaýǵa múmkindik berdi», - dedi Almaty oblysynyń ákimi Marat Sultanǵazıev.
Eske salaıyq, 30 naýryzda Іle aýdany Baıkent aýyldyq okrýgindegi Voroshılov sý qoımasynyń bógeti buzylǵan edi.
Onyń saldarynan zardap shekkender men qaza tapqandar bolmasa da, 28 adam evakýatsııalandy.
