Almaty oblysynyń sport basqarmasyna jańa basshy taǵaıyndaldy
QONAEV. KAZINFORM — Almaty oblysy ákiminiń ókimimen Aıbol Qulbaev Almaty oblysy dene shynyqtyrý jáne sport basqarmasynyń basshysy laýazymyna taǵaıyndaldy.

Aıbol Qulbaev 1986 jyly týǵan. Bilimi - joǵary.
2008 jyly Qazaq sport jáne týrızm akademııasynda «Dene shynyqtyrý jáne sport» mamandyǵy boıynsha bakalavry, 2010 jyly magıstr, 2015 jyly «Dene shynyqtyrý jáne sport» mamandyǵy boıynsha doktory dárejelerin alǵan.
2018 jyly Reseı halyqaralyq olımpıadalyq ýnıversıtetinde «Sporttaǵy menedjment pen marketıng» mamandyǵy boıynsha qosymsha kásibı bilim berý baǵdarlamasyn aıaqtaǵan.
Eńbek jolyn 2009 jyly Almaty tehnologııalyq ýnıversıtetiniń tehnologııa-ekonomıkalyq kolledjiniń oqytýshysy bolyp bastady.
Ár jyldary Qazaq sport jáne týrızm akademııasynyń aǵa oqytýshysy, ǵylym, halyqaralyq baılanys jáne joǵary oqý ornynan keıingi bilim berý departamentiniń dırektory, bólim jetekshisi, ǵylym jáne strategııalyq damý jónindegi prorektory, Dene shynyqtyrý jáne buqaralyq sport akademııasynyń ǵylym jáne halyqaralyq yntymaqtastyq jónindegi prorektory laýazymdarynda qyzmet atqarǵan.
2024 jyldan bastap búgingi kúnge deıin Q.Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat kolledjiniń dırektory boldy.
Eske salaıyq, buǵan deıin Almaty oblysynyń ákimdiginde kadrlyq aýys-túıis bolǵanyn jazǵanbyz.