Almaty oblysynyń soty Jomart Ertaevtyń qamaýǵa alynatynyn rastady
QONAEV. KAZINFORM — Almaty oblystyq sotynda sottalǵan Jomart Ertaevqa qatysty raqymshylyqty qoldaný máselesi boıynsha materıal apellıatsııalyq tártipte qaraldy.
Oblystyq sot málimetinshe, 2025 jyldyń 2 qyrkúıeginde Almaty oblysy Alataý qalasy sotynyń qaýlysymen Jomart Ertaevtyń ótinishi qanaǵattandyrylyp, oǵan 11 aı 16 kún ótelmegen jaza merzimi boıynsha raqymshylyq qoldanylyp, bosatylǵan.
Atalǵan raqymshylyq tarmaǵyna sáıkes, aýyr jáne asa aýyr qylmys jasaǵan, jaǵymsyz minez-qulqy joq, óteýge qalǵan jaza merzimi 1 jyldan aspaıtyn sottalǵandarǵa jazanyń ótelmegen bóligi qysqartylady.
— Ertaev eki úkim boıynsha sottalǵan: 2020 jylǵy 16 qarashadaǵy jáne 2021 jylǵy 3 naýryzdaǵy úkim. 2021 jylǵy 25 maýsymdaǵy Almaty qalasy Almaly aýdany sotynyń qaýlysymen bul úkimder jıyntyǵymen túpkilikti jaza merzimi belgilengen. Alaıda Ertaevqa jaza merzimi qaı úkimnen bastap esepteletini kórsetilmegen. Alataý qalasy sotynyń qaýlysymen № 14 mekemeniń anyqtamasy arasynda ótelmegen jaza merzimi boıynsha aıyrmashylyq bar. Sonymen qatar mekeme anyqtamasyna basshy qol qoımaǵan. Joǵaryda atalǵan mán-jaılarǵa baılanysty, sottalǵan Ertaevqa raqymshylyq aktisin qoldaný týraly sot qaýlysy kúshin joıdy, onyń ótinishi qanaǵattandyrýsyz qaldyryldy, — dep túsindirdi Almaty oblystyq sotynyń baspasóz qyzmeti.
Buǵan deıin Májilis depýtaty Abzal Quspan 11 jylǵa bas bostandyǵynan aıyrylǵan Jomart Ertaevtyń raqymshylyqqa ilinýi týraly sheshim qaıta qaralǵanyn habarlady.
Eske salaıyq, 2020 jyly RBK Bank-ten 144 mıllıard teńge jymqyrǵany úshin sottalǵan belgili bankır Jomart Ertaev jalpy rejımdegi kolonııadan bosatyldy.
Jomart Ertaev 2018 jylǵy mamyrda Máskeýde Qazaqstan ІІM Interpol ulttyq ortalyq bıýrosynyń suraýy boıynsha ustalǵan. Ol asa iri kólemdegi alaıaqtyq jasady degen kúdikpen halyqaralyq izdeýde bolǵan. 2019 jylǵy naýryzda ol Reseı Federatsııasynan Qazaqstanǵa ekstradıtsııalandy.
Tergeý dereginshe, Ertaev 2011-2017 jyldary qyzmettik ókiletin paıdalanyp, aldyn ala sóz baılasqan tulǵalarmen birge «Bank RBK» AQ-nan 144 mlrd teńge jymqyrdy degen kúdikke ilindi.
Bul iske barlyǵy 54 adam tartylyp, olardyń qatarynda 41 top-menedjer men bank qyzmetkerleri bolǵan.
2020 jylǵy qarashada Almaty soty Jomart Ertaevty 11 jylǵa bas bostandyǵynan aıyrdy.