Almaty oblysynyń sharýalary jeńildetilgen dızel otynymen tolyq qamtyldy
QONAEV. KAZINFORM – Almaty oblysynda aýyl sharýashylyǵy taýar óndirýshilerin qoldaý maqsatynda kóktemgi jáne kúzgi dala jumystaryna arnalǵan dızel otynyn bólý jáne jetkizý jumystary josparǵa saı iske asyrylyp jatyr. Bul týraly Almaty oblysynyń aýyl sharýashylyǵy basqarmasy basshysy orynbasarynyń mindetin atqarýshy Dımash Sydyqov óńirlik kommýnıkatsııa alańynda ótken baspasóz máslıhatynda aıtty.
Bıyl kóktemgi dala jumystaryna 3 650 tonna dızel otyny bólingen. Al kúzgi naýqanǵa oblystyń 201 aýyl sharýashylyǵy taýar óndirýshisi tarapynan 1 366,7 tonna otynǵa ótinim berilgen. Bul kólem tolyqtaı jetkizilip, búginge deıin 100% – 1 366,7 tonnasy sharýalarǵa jóneltildi.
Kúzgi naýqanǵa bólingen dızel otyny óńirlerge mynadaı kólemde jetkizildi:
• Raıymbek aýdany – 313,8 t (60 AShTÓ)
• Jambyl aýdany – 193,6 t (33 AShTÓ)
• Eńbekshiqazaq aýdany – 162,3 t (29 AShTÓ)
• Іle aýdany – 186,5 t (23 AShTÓ)
• Uıǵyr aýdany – 37,8 t (20 AShTÓ)
• Kegen aýdany – 56,3 t (13 AShTÓ)
• Qarasaı aýdany – 111,4 t (8 AShTÓ)
• Talǵar aýdany – 120,9 t (8 AShTÓ)
• Qonaev qalasy – 159,1 t (6 AShTÓ)
• Balqash aýdany – 25 t (1 AShTÓ)
2025 jylǵa oblysqa 5016,7 tonna dızel otyny bólingen. Buǵan qosa, sharýalardyń suranysyn óteý maqsatynda taǵy 3 myń tonna qosymsha dızel otynyna ótinim qabyldanyp jatyr. Qosymsha kólemniń 43,3 tonnasy sharýashylyqtarǵa jóneltilip úlgerdi.
Sonymen birge, 2025 jyldyń 1–30 jeltoqsan aralyǵynda kóktemgi jáne kúzgi dala jumystaryna qajetti dızel otynyna ótinim qabyldaý bastalady.
«Biz úshin eń basty mindet – aýyl sharýashylyǵy taýar óndirýshilerin ýaqytyly ári jetkilikti kólemde dızel otynymen qamtamasyz etý. Bıyl kóktemgi jáne kúzgi dala jumystaryna bólingen otyn tolyq jetkizildi. Qosymsha suranystar da nazarda, sharýalarǵa qajetti kólem kezeń-kezeńimen berilip jatyr. Bul – agrarlyq sektordyń turaqty jumys isteýine jasalǵan qoldaý», – dedi Dımash Sydyqov.
Aýyl sharýashylyǵy taýar óndirýshileri úshin dızel otynynyń baǵasy naryqtan 26%-ǵa arzan — lıtri 250 teńge kóleminde belgilengen.
Aıta keteıik, Almaty oblysynyń sharýalary PepsiCo-ǵa kartop jetkize bastady.