Almaty oblysynyń máslıhaty Konstıtýtsııa jobasyn qoldady
ASTANA. KAZINFORM — Jańa Konstıtýtsııa jobasyndaǵy tsıfrlyq ortany retteý jáne jekelegen óńirler mártebesine qatysty usynystar Almaty oblysynyń turǵyndary úshin aıryqsha mańyzdy. Bul týraly Almaty oblysy máslıhatynyń tóraǵasy Qýat Baıǵojaev Konstıtýtsııalyq komıssııanyń XI otyrysynda aıtty.
Onyń aıtýynsha, Almaty oblysy — halyq tyǵyz qonystanǵan, tsıfrlyq servıster belsendi iske qosylǵan óńirlerdiń biri. Sondyqtan, ulttyq ekonomıkanyń ósý draıverine aınalýy tıis «Alatau City» jobasy dál osy óńirde qolǵa alynyp jatyr.
— Búginde azamattardyń qaýipsizdigi máselesi qalyptasqan uǵymdar sheńberinen shyǵyp, tsıfrlyq tehnologııalar deńgeıine deıin kóterilgenin kórip otyrmyz. Tsıfrlyq tehnologııa qoǵamnyń barlyq salasyna aralasyp, kúndelikti adam ómiriniń ajyramas bóligine aınaldy. Al jańa Konstıtýtsııa jobasynda azamattardyń tsıfrlyq saladaǵy quqyǵyn qorǵaý mindeti qarastyrylǵany — búgingi kún talaby ekeni daýsyz, — dedi Q. Baıǵojaev.
Spıkerdiń aıtýynsha, azamattardyń ózara hat-habar almasý qaýipsizdigi, elektrondy kommýnıkatsııa, derbes derekterdiń qorǵalýy syndy máselelerdiń qamtylýy jeke ómir qupııasy kepildigin nyǵaıtyp, tsıfrlyq servısterge degen senimdi kúsheıtedi.
— Olardyń konstıtýtsııalyq deńgeıde bekitilýi tsıfrlyq qaýipsizdik salasyndaǵy zańnamany ári qaraı damytý tájirıbesine berik negiz bola alady. Ásirese, Konstıtýtsııa jobasynyń quqyqtar men bostandyqtardy kemitpeı, olardy jańa tehnologııalyq jaǵdaılarǵa beıimdeý qaǵıdatyn basshylyqqa alatyny azamattar úshin óte mańyzdy. Usynylyp otyrǵan ózgerister azamattar úshin naqty máselelerden kórinis tabýy qarapaıym azamattardyń kúndelikti ómirde alańsyz bolyp, qoǵamnyń memlekettik ınstıtýttarǵa degen senimin kúsheıtýge áser etedi, — dedi ol.
Sóz sońynda Komıssııa múshesi Konstıtýtsııa jobasy jetkilikti pysyqtalǵanyn jáne ony búkilhalyqtyq referendýmǵa shyǵarýǵa bolatynyn aıtty.
Eske sala ketsek, búgin Memleket basshysy Qasym-Jomart Toqaev Úkimettiń keńeıtilgen otyrysynda Ata Zańymyzǵa qatysty túpkilikti sheshim jalpyulttyq referendýmda qabyldanatynyn aıtqan edi.