Almaty oblysynyń qaı joldarynda ortasha jyldamdyq rejımi engizildi

QONAEV. KAZINFORM – Almaty oblysynda jol qaýipsizdigin arttyrý maqsatynda ortasha jyldamdyqty tirkeý júıesi engizildi.

Buǵan deıin ortasha jyldamdyqty baqylaý júıesi Úlken Almaty aınalma avtomobıl jolynda jumys istep turǵanyn jazǵanbyz. 

Oblystyq polıtsııa departamenti júıe engizilgen joldar tizimi tolyqqanyn málimdedi. Polıtsııa málimetinshe, qazir óńirdegi respýblıkalyq mańyzy bar barlyq avtojoldarda kólikterdiń ortasha jyldamdyǵy ólshenedi. Atap aıtqanda, «Almaty-Bishkek», «Almaty-Qonaev», «Almaty-Shelek-Qorǵas» jáne «Almaty-Astana» tas joldary bar.

Tártip saqshylary endi jyldamdyqty asyrǵan árbir júrgizýshi avtomatty túrde tirkelip, zańnamaǵa sáıkes jaýapkershilikke tartylatynyn atap ótti.

Eske salaıyq, ortasha jáne belgilengen jyldamdyqty esepteý mehanızmin engizý nátıjesinde byltyr jol boıyndaǵy qaýipsizdik artyp, jol-kólik oqıǵalarynyń sany shamamen 10% tómendedi.

Al kólik aǵymy 45 mıllıonnan 54 mıllıonǵa deıin, ıaǵnı 20% ósti.