Almaty oblysynyń kásipkerlerimen usynylyp otyrǵan salyq reformalary talqylandy

ALMATY. KAZINFORM – Almaty oblysynda QR ulttyq ekonomıka vıtse-mınıstri Baýyrjan Qudaıbergenov pen QR Qarjy mınıstrligi Memlekettik kirister komıteti Salyq jáne keden saıasaty departamenti dırektorynyń orynbasary Nurlybek Shaımahanovtyń qatysýymen salyq zańnamasyna engizilgen ózgeristerdi túsindirý boıynsha keńes ótti.

Іs-sharaǵa jergilikti atqarýshy organdardyń, máslıhattardyń, Almaty oblysy Kásipkerler palatasynyń ókilderi jáne 100-ge jýyq kásipker qatysty.

Talqylaýdyń negizgi taqyryby salyq reformasy, atap aıtqanda, salyq salý júıesindegi ózgerister, sonyń ishinde QQS mólsherlemesin arttyrý jáne saralanǵan tásildi engizý boldy.

Óz sózinde QR ulttyq ekonomıka vıtse-mınıstri Baýyrjan Qudaıbergenov keńeske qatysýshylardy Úkimettiń QQS mólsherlemesin 16% deńgeıinde belgileý, birqatar basym sala úshin 10% tómendetilgen mólsherlemeni engizý jáne aýyl sharýashylyǵy taýaryn óndirýshilerdi salyqtan bosatý jónindegi usynysymen tanystyrdy.

Sonymen qatar QQS boıynsha esepke qoıý shegin 15 mln teńgege deıin tómendetý jáne qoldanystaǵy arnaýly salyq rejımderin reformalaý usynylady.

Reformalar qosylǵan qun týdyrmaıtyn, biraq negizinen tranzaktsııalyq operatsııalar, qarajatty qaıta bólý nemese zańsyz áreketter arqyly paıda tabatyn qyzmet túrlerine ádil salyq salýǵa baǵyttalǵany atap ótildi.

Talqylaý barysynda Almaty oblysy bıznes-qoǵamdastyǵynyń ókilderi aldaǵy salyqtyq ózgeristerge qatysty óz pikirlerin bildirdi.

Almaty oblysy Kásipkerler palatasy janyndaǵy Saýda jáne qyzmet kórsetýdiń salalyq keńesi tóraǵasy Áset Talǵatbek arzan nesıeler úshin bazalyq mólsherlemelerdi tómendetýdi jáne salyq tóleý júıesin jeńildetýdi usyndy.

Bilim Invest ulttyq bilim berý ınvestorlary qaýymdastyǵynyń vıtse-prezıdenti Kúlánda Batyrbekova reformalardy júrgizý kezinde bilim salasyna qoldaý kórsetý qajettigine toqtaldy. Atap aıtqanda, óńirlerdiń bilim berý salasyn damytý kartasyn ázirleýdi usyndy.

«Aýyldardaǵy bilim berý uıymdarynyń damýyn baqylaý qajet. Ol úshin jekemenshik bilim berý mekemelerin saralaý kerek. Jeke ǵımaraty bar mektepter men balabaqshalar bar, úı-jaıdy jalǵa alatyndar bar. 50-75 balaǵa arnalǵan, 100-200 balaǵa eseptelgen tárbıe jáne bilim berý mekemeleri bar», - dep túsindirdi Kúlánda Batyrbekova. 

Sondaı-aq spıker salyqty kóterýmen qatar, bıýdjet shyǵystarynyń qurylymyna syn kózben qaraýdyń mańyzdy ekenine toqtaldy. Qatań bıýdjettik erejelerdiń saqtalýyn baqylaýdy kúsheıtý qajet.

Qorytyndylaı kele, keńeske qatysýshylar salyq saıasatyndaǵy ońtaıly sheshimderdi izdeý úshin memleket pen bıznes arasyndaǵy syndarly dıalogtiń mańyzdylyǵyn atap ótti.

Táýelsiz Kásipkerler qaýymdastyǵynyń tóraǵasy Qambar Baekenov reformalardyń ashyqtyǵy men kásipkerlerdiń pikirlerin esepke alý shaǵyn jáne orta bıznesti qoldaýdyń tıimdi tetikterin ázirleýge múmkindik beretinine senim bildirdi, bul óz kezeginde elimizdiń ekonomıkalyq damýyna oń áserin tıgizedi.

Qorytyndylaı kele, vıtse-mınıstr Baýyrjan Qudaıbergenov barlyq usynys jınalyp, taldanatynyna jáne jumys barysynda eskeriletinine sendirdi.

Esterińizge sala keteıik, Premer-mınıstr Oljas Bektenovtiń tapsyrmasy boıynsha elimizdiń barlyq óńirinde bıznes ókilderimen kezdesýler ótýde. Osy kezdesýler sheńberinde aıtylǵan usynystar Úkimette muqııat taldanyp, ári qaraı Parlament qaraýyna jáne zańnamalyq bastamalarǵa engizýge joldanady.