Almaty oblysyn 4 jyl basqarǵan Marat Sultanǵazıev nesimen este qaldy
QONAEV. KAZINFORM — Almaty oblysyn 4 jyl 2 aıdan astam ýaqyt basqarǵan Marat Sultanǵazıev nesimen este qaldy? Kazinform tilshisi Marat Sultanǵazıevtiń Almaty oblysyn basqarǵan kezeńine sholý jasap, óńirde júzege asqan negizgi jobalar men osy ýaqyt aralyǵynda bolǵan atyshýly oqıǵalardy saralap shyqty.
Marat Sultanǵazıev 1976 jyly Almaty oblysynda dúnıege kelgen. Abaı atyndaǵy Almaty memlekettik ýnıversıtetin, Qazaq memlekettik zań akademııasyn, Turar Rysqulov atyndaǵy Qazaq ekonomıkalyq ýnıversıtetin támamdaǵan. Mamandyǵy boıynsha — ekonomıst-qarjyger, zańger, iskerlik ákimshilendirý magıstri.
Ár jyldary Salyq departamentin, Memlekettik kirister departamentin, Memlekettik kirister komıtetin basqarǵan. Óńir basshylyǵyna kelgenge deıin Qazaqstan Respýblıkasynyń Qarjy birinshi vıtse-mınıstri qyzmetin atqardy. Al 2022 jyldyń 11 maýsymynda Almaty oblysynyń ákimi bolyp taǵaıyndaldy.
Qaıta qurylǵan oblys pen Alataý qalasy
Marat Eleýsizuly ekige bólinip, qaıta qurylǵan óńirdiń tizginin aldy. 2022 jyldyń 8 maýsymynan bastap Almaty oblysynyń quramynan Aqsý, Alakól, Eskeldi, Qaratal, Kerbulaq, Kóksý, Panfılov, Sarqan aýdandaryn, Taldyqorǵan jáne Tekeli qalalaryn bólý jolymen ákimshilik ortalyǵy Taldyqorǵan qalasynda ornalasatyn Jetisý oblysy quryldy.
Sondyqtan jańa ákim Almaty oblysynyń ákimshilik ortalyǵy Qonaev qalasynan jumys istedi. 2022 jyldyń aıaǵynda Almaty oblysynyń ákimdigi burynǵy kazıno ǵımaratyna kóshti.
2023 jyldyń aıaǵynda Qonaevta áleýmettik jáne ákimshilik nysandardy salý boıynsha keshendi jospar bekitilip, bıýdjetti birneshe ese ósken qalada jańa ǵımarattardyń qurylysy bastaldy. Odan bólek oblys ortalyǵynda akademııalyq qalashyq qurýǵa kelisim jasaldy.
Sondaı-aq 2024 jyly Prezıdent Jarlyǵymen Almaty oblysynda Alataý qalasy quryldy. Qonaev pen Alataý qalalaryn damytý óńir basshysy Marat Sultanǵazıevke júkteldi. 2025 jyly Almaty oblysynda eldegi alǵashqy AES qurylysynyń bastalýy da eks-ákimniń basshylyq etken kezeńimen tuspa-tus keldi.
Alaıda 2026 jyly Alataý qalasyn damytý jónindegi keńeste Prezıdent Qasym-Jomart Toqaev Marat Sultanǵazıevtiń qatelikterin atap, onyń jumysyn synǵa aldy.
— Elektrdiń jıi óshýine qatysty aryz-shaǵymnyń kóptigin bylaı qoıǵanda, turaqty ınternettiń, sapaly joldyń, ortalyqtandyrylǵan sýdyń joqtyǵyn alǵa tartady. Mundaı problemalar oblystyń barlyq aýmaǵynda bar. Máselen, 2025 jyly elektr jelisiniń tozýy 70 paıyzǵa jýyqtap, sonyń saldarynan elektr qýatynyń óshirilýi 919 ret, al jyl basynan beri 201 márte tirkelgen. Alatau Smart-City salý mindetteri men óńirdegi naqty áleýmettik-ekonomıkalyq jaǵdaı arasynda qarama-qaıshylyq aıqyn baıqalady. Bul ákim Marat Sultanǵazıevtiń tarapynan jiberilgen olqylyq dep sanaımyn, — dedi Prezıdent.
Degenmen, Marat Sultanǵazıev jumys istegen ýaqyt ishinde oń kórsetkishter de joq emes. Oblys ákimdiginiń málimetinshe, 2022 jyldan beri oblystyń jalpy óńirlik ónimi shamamen 3,4 trıllıon teńgeden 6,8 trıllıon teńgege artqan. Ónerkásip óndirisiniń kólemi 1,6 trıllıonnan 2,6 trıllıon teńgege deıin ósti. Qarasaı jáne Іle aýdandarynan bólek donor-aýmaqtar qataryna Eńbekshiqazaq, Talǵar, Jambyl aýdandary men Qonaev qalasy qosyldy.
Sonymen qatar turǵyndar tarapynan oń baǵalanǵan jobalardyń biri — Qonaev qalasyndaǵy jaǵajaılardy damytý.
Jańǵyrtýdan ótken Qapashaǵaı jaǵasyndaǵy qoǵamdyq keńistik tek qala turǵyndary emes, Almaty qalasy men ózge aýdandar keletin adamdardyń súıikti demalys ornyna aınaldy. Máselen, osy jazda Qapshaǵaı sý qoımasyna eki mıllıonnan astam adam kelgen.
Sherzat isi, «Baǵanashyl daýy» jáne TJ jaǵdaı
Marat Sultanǵazıev basshylyǵy kezinde Almaty oblysynda birneshe rezonansty oqıǵa boldy. Olardyń biri — Talǵar aýdanynda bolǵan 16 jastaǵy Sherzat Polattyń ólimi.
2024 jyly bul másele óńir aýmaǵynan shyǵyp, el kóleminde talqylandy. Atalǵan jaǵdaıǵa baılanysty ótkizilgen jedel shtab otyrysynda oblys ákimi kináliler jaýapqa tartylatynyn jáne jaǵdaı baqylaýda bolatynyn aıtty.
Al 2025 jyly shildede «Baǵanashyldaǵy» balalar úıine baılanysty daý boldy. Mekeme tárbıelenýshilerin jańa orynǵa kóshirý durys uıymdastyrylmaǵany úshin qoǵam tarapynan óńir basshysy qatty synǵa ushyrady.
Máselege tipti, Memleket basshysy aralasyp, Qasym-Jomart Toqaevtyń tapsyrmasymen balalar úıi oblysqa kóshirilmeıtin boldy. Daýdan keıin Almaty oblysy ákiminiń orynbasary jáne eki basqarmanyń basshysy qyzmetinen bosatyldy.
Sondaı-aq 2025 jyldyń qazan aıynda Alataý qalasynyń aýmaǵyndaǵy qoqys polıgonynda 1 aptaǵa jýyq alapat órt boldy. Oǵan baılanysty Alataýda jergilikti aýqymdaǵy tehnogendik sıpattaǵy tótenshe jaǵdaı rejımi engizilip, ol 1,5 aıdan keıin alyndy. Bul jaǵdaı da turǵyndar tarapynan oblys basshylyǵyna qatysty narazylyq týdyrdy.
Eske salaıyq, 4 qyrkúıekte Memleket basshysynyń Jarlyǵymen Marat Sultanǵazıev Almaty oblysynyń ákimi laýazymynan bosatyldy.
Eks-ákim áleýmettik jelidegi paraqshasynda oblys turǵyndaryna jyly lebizin bildirdi.
— Búgin osy óńirdegi qyzmetimdi aıaqtaı otyryp, tórt jyl boıy qoldap kelgen barshańyzǵa alǵys aıtamyn. Almaty oblysy ózimniń týyp-ósken topyraǵym. Tórt jyl buryn maǵan senim artyp, osy óńirdi basqarýǵa múmkindik bergen Memleket basshysy Qasym-Jomart Kemeluly Toqaevqa alǵysym sheksiz. Prezıdent bastamalaryn júzege asyryp, halyqtyń údesinen shyǵý úshin bar bilimim men tájirıbemdi jumsadym, — dep jazdy ol.
Sondaı-aq búgin Memleket basshysynyń Jarlyǵymen Shyńǵys Árinov Almaty oblysynyń ákimi laýazymyna taǵaıyndaldy. Ol buǵan deıin Tótenshe jaǵdaılar mınıstri qyzmetin atqardy.
