Almaty oblysynyń birneshe aýdany men Qonaevta jylytý maýsymy bastaldy

QONAEV. KAZINFORM – Almaty oblysynyń aýdandarynda kezeń-kezeńmen jylý berilip keledi. 

Oblys ákimdiginiń málimetinshe, aýa raıy jaǵdaılaryn eskere otyryp, jylytý maýsymy Kegen aýdanynda 24 qyrkúıekte bastaldy. 1 qazan kúni Jambyl aýdanynda, 6 qazan kúni Talǵar, Іle aýdandarynda jáne Qonaev qalasynda jylý berildi. Qalǵan aýdandar men qalalarda jylý berý kezeń-kezeńimen 15 qazanǵa deıin júzege asyrylady. 

– Almaty oblysy jylytý maýsymyna tolyq daıyn. Óńirdiń birneshe aýdanynda jylý berý jumystary bastaldy. Aldaǵy jylytý maýsymyna daıyndyq aıasynda 2,7 shaqyrym jylý jelisi jańartyldy. Bul sharalar jelilerdiń tozý deńgeıin 42%-dan 40%-ǵa deıin tómendetýge múmkindik beredi, - dep habarlady ákimdikten.

Sondaı-aq halyqty otynmen qamtamasyz etý úshin 696 myń tonna kómir qarastyrylǵan. Búgingi tańda óńirge 187 myń tonna (2 710 vagon) kómir jetkizildi.

Eske salaıyq, buǵan deıin Almaty oblysynyń qaı aýdandaryna jylý birinshi beriletinin jazǵanbyz.