Almaty oblysynyń bıligi turǵyn úıdi salýdyń ornyna daıynyn satyp alýǵa kóshti
Almaty oblysynda mektep jasyndaǵy balalar sany jyl saıyn 13 myńǵa kóbeıedi. Óńirde halyq sanyna qaraı baspana salý kórsetkishi de artyp keledi. Bul týraly Almaty oblysynyń ákimi Marat Sultanǵazıev «Jibek Joly» telearnasyndaǵy «Ýáde» baǵdarlamasynda aıtty, dep habarlaıdy Kazinform.
Baǵdarlama júrgizýshisi Erbolat Muhamedjan oblysta 1,5 mln halyq turatynyn, ondaǵy eń basty másele – turǵyn úı jetispeýshiligi ekenin aıtty.
«Óńirde adam sanynyń artýynyń eki sebebi bar – jergilikti halyqtyń kóbeıýi men mıgratsııalyq protsester. Sol sebepti jyl saıyn turǵyn úı máselesi ózekti bola túsedi. Qazirgi ýaqytta 37 myńnan astam adam kezekte tur. Memleket baspana beretin 9 sanat bar, solarǵa Úkimet kómektesedi, al qalǵan turǵyndar basqa da baǵdarlamalarǵa qatysa alady», – dedi Marat Sultanǵazıev.
Turǵyn úı qurylysy jóninde oblys basshysy bıyl tapsyrylǵan baspana byltyrǵy kórsetkishten 4 paıyzǵa joǵary ekenin aıtty.
«Respýblıka boıynsha eki úlken megapolıs qaladan keıin biz úshinshi orynda turmyz. Óńirde tek qana mektep jasyndaǵy balalar sany jyl saıyn 13 myńǵa artyp otyrady. Sodan keıin biz – jergilikti atqarýshy organdar úı salýdan jumystarynan alshaqtap, daıyn, salynǵan úıdi sapasyna qarap, satyp alý prıntsıpine kóship jatyrmyz. Onyń ózinde de memlekettiń bir sharshy metrge bólgen aqshasy Almatynyń mańaıynda úı satyp alýǵa jetkiliksiz, sol sebepti shalǵaı aýyldarda sol ustanymmen jumys istep jatyrmyz», – deıdi Almaty oblysynyń ákimi.
