Almaty oblysynyń aýdanynda 1,5 mlrd bıýdjet qarajaty tıimsiz josparlanǵan
QONAEV. KAZINFORM – Almaty oblysy Eńbekshiqazaq aýdanynda bıýdjet qarajaty men memleket aktıvterin paıdalaný tıimdiligine memlekettik aýdıt júrgizildi.
Onyń qorytyndysy týraly Almaty oblysy boıynsha tekserý komıssııasynyń memlekettik aýdıt bóliminiń bas maman-memlekettik aýdıtory Baqytjan Moldabekov baıandady. Aıtýynsha, jalpy kólemi 45,5 mlrd teńgeden astam qarjyǵa taldaý jasalǵan. Aýdıt nátıjesinde jalpy somasy 9,6 mlrd teńgege jýyq quqyq buzýshylyqtar anyqtalǵan. Bul - tekserýmen qamtylǵan qarjy kóleminiń 21 paıyzy.
- Anyqtalǵan buzýshylyqtardyń negizgi bóligin 7,2 mlrd teńge kólemindegi qarjylyq buzýshylyqtar qurady. Sonymen qatar 1,5 mlrd teńge kóleminde tıimsiz josparlanǵan bıýdjet qarajaty, 587,2 mln teńge kóleminde tıimsiz paıdalanylǵan qarajat jáne 257,2 mln teńge kóleminde yqtımal shyǵyndar men jiberip alǵan paıda faktileri anyqtaldy. Budan bólek rásimdik sıpattaǵy úsh buzýshylyq tirkeldi, - dedi ol.
Al Almaty oblysy boıynsha tekserý komıssııasynyń múshesi Erik Baqytov zańnama talaptarynyń saqtalmaýyna jol bergen memlekettik aýdıt obektileriniń 11 qyzmetkeri tártiptik jaýapkershilikke tartylǵanyn atap ótti. Olardyń qatarynda aýyldyq okrýg ákimderi apparattarynyń mamandary men aýdandyq kitaphana qyzmetkeri bar.
- Tártiptik jazalardyń basym bóligi «eskertý» túrinde qoldanylsa, bir qyzmetkerge «sógis» jarııalanǵan. Aýdıt qorytyndysy boıynsha anyqtalǵan zań buzýshylyqtardyń saldaryn joıý jáne olardyń qaıtalanýyna jol bermeý maqsatynda naqty usynymdar men nusqamalar berildi, - dedi Erik Baqytov.
Eske salaıyq, buǵan deıin Almaty oblysynda aýdıt nátıjesinde birneshe aýyl ákimine aıyppul salynǵanyn jazǵanbyz.
