Almaty oblysynyń ákimdigi 19 mln teńgege túsireletin komıksterge qatysty túsinik berdi

QONAEV. KAZINFORM – Almaty oblysynda tender arqyly 19 mln teńgege komıks daıyndalady. Osyǵan baılanysty óńir ákimdigi túsinik berdi. 

Oblys ákimdiginiń málimetinshe, joba dástúrli qundylyqtardy nasıhattaýǵa jáne ekstremızmge qarsy turýǵa baǵyttalǵan. Medıa saýattylyq pen ulttyq biregeılikti damytýǵa basa nazar aýdarylady. 

– Aqparattyq-tsıfrlyq materıaldardy ázirleýge 19 701 000 teńge qarastyrylǵan. Soma naryqtaǵy baǵa men shyǵyndardy egjeı-tegjeıli taldaý arqyly negizdeldi, - dep túsindirdi ákimdiktiń baspasóz qyzmeti. 

Joba kámeletke tolmaǵandardyń destrýktıvti aǵymdarǵa tartylýyn azaıtýǵa jáne mádenı qundylyqtardy nyǵaıtýǵa kómektesedi. 

– 2024 jyly óńirde júrgizilgen áleýmettik zertteýlerdiń málimetteri boıynsha, kámeletke tolmaǵandar arasyndaǵy dinı senim deńgeıi 55%-dan asady, al shamamen 35%-y dinı bilimdi ınternet arqyly alady, - dep atap ótti ákimdikten. 

Buǵan deıin Almaty oblystyq din isteri basqarmasy ekstremızmge qarsy kúres pen dástúrli qundylyqtardy dáripteý úshin arnaıy komıkster túsirýge tapsyrys bergeni týraly jazǵan edik.