Almaty oblysynyń ákimi Memlekettik rámizder kúni qarsańynda oqýshylarmen áńgimelesti
QONAEV. KAZINFORM – Memlekettik rámizder kúni qarsańynda Almaty oblysynyń ákimi Marat Sultanǵazıev Qonaev qalasyndaǵy Berdibek Soqpaqbaev atyndaǵy saıabaqta oqýshylarmen kezdesti.
Erkin formatta uıymdastyrylǵan kezdesýge 35-ke jýyq bala qatysty. Ashyq aspan astynda ótken júzdesý barysynda oqýshylar oblys ákimine ózderin tolǵandyrǵan saýaldaryn qoıyp, Qazaqstannyń memlekettik rámizderiniń tarıhy men mańyzy týraly pikir almasty.
Kezdesý barysynda óńir basshysy Memlekettik Tý, Eltańba jáne Ánuran táýelsiz Qazaqstannyń basty nyshandary ekenin aıtyp, olardy qurmetteý ár azamattyń mindeti ekenin atap ótti.
– Memlekettik rámizder – bizdiń táýelsizdigimizdiń, birligimizdiń jáne eldigimizdiń belgisi. Olardy qurmetteý – týǵan elge degen qurmettiń kórinisi. Árbir qazaqstandyq Týymyzdy, Eltańbamyzdy jáne Ánuranymyzdy maqtan tutyp, qadirleı bilýi kerek, – dedi Marat Sultanǵazıev.
Kezdesý barysynda oblys ákimi memlekettik rámizderge qatysty qyzyqty derektermen bólisti. Ásirese Qazaqstannyń Kók Týynyń ǵaryshqa kóterilgeni jáne álemniń eń bıik shyńdarynda jelbiregeni týraly málimetter balalardyń erekshe qyzyǵýshylyǵyn týdyrdy.
Oqýshylar memlekettik rámizderdiń avtorlary, olardyń mán-maǵynasy jáne Qazaqstannyń halyqaralyq arenadaǵy jetistikteri týraly suraqtar qoıyp, óz oılaryn erkin jetkizdi.
– Mundaı kezdesýler jas urpaqtyń boıynda patrıottyq qundylyqtardy qalyptastyrýǵa yqpal etedi. Balalar memlekettik rámizderdiń tarıhyn ǵana emes, olardyń el ómirindegi mańyzyn da tereń túsinýi qajet, – dep atap ótti oblys ákimi.
Shara ashyq dıalog formatynda ótip, oqýshylar men óńir basshysy arasynda erkin pikir almasýǵa múmkindik berdi.
