Almaty oblysynyń ákimi Quryltaı depýtattaryn saılaýda daýys berdi
QONAEV. KAZINFORM – Almaty oblysynyń ákimi Marat Sultanǵazıev Qonaev qalasyndaǵy № 949 saılaý ýchaskesinde daýys berdi. Óńir basshysy óz tańdaýyn jasaǵan soń, jýrnalısterge saılaý barysy týraly aıtyp berdi.
— Búgin — elimiz úshin mańyzdy saıası kún. Men de Almaty oblysynyń turǵyny ári Qazaqstan azamaty retinde tirkelgen saılaý ýchaskeme kelip, óz tańdaýymdy jasadym. Jalpy bizdiń óńirde mıllıonnan astam azamat daýys berýge quqyly. Búgin oblysta 683 saılaý ýchaskesi jumys istep jatyr. Saılaýshylarǵa qajetti jaǵdaıdyń bári jasalǵan, — dedi Almaty oblysynyń ákimi.
Sondaı-aq ol búgingi saılaý nátıjeleri elimizdiń odan ári damýyna oń áser etetinine senim bildirdi. Bul ózgerister Qazaqstan úshin jańa ári mańyzdy kezeń ekenine toqtaldy.
— Memleket basshysy Qasym-Jomart Kemeluly Toqaev óz Joldaýynda bul saılaý ult taǵdyryna tikeleı áser etetin tarıhı oqıǵa ekenin atap ótti. Saıası shara qoǵamdyq dıalogty jańa deńgeıge kóterip, elimizdiń bolashaǵyn birge aıqyndaýǵa múmkindik beredi, — dedi óńir basshysy.
Aıta keteıik, búgin saǵat 07:00–den bastap Almaty oblysynda 683 saılaý ýchaskesi jumysyn bastady. Saılaý barysyn otandyq jáne halyqaralyq baıqaýshylar baqylap otyr.
