Almaty oblysynyń ákimi áıelder qaýymyn búgingi merekemen quttyqtady
ALMATY. KAZINFORM – Almaty oblysynyń ákimi Marat Sultanǵazıev barsha názik jandy arýlardy 8 Naýryz - Halyqaralyq áıelder kúni merekesimen quttyqtady.
«Ardaqty aq jaýlyqty analar, aıaýly arýlar! Barshańyzdy meıirim men shapaǵatqa toly kóktemniń shýaqty merekesi – Halyqaralyq áıelder kúnimen shyn júrekten quttyqtaımyn!
Memleket basshysy Qasym-Jomart Kemeluly Toqaevtyń «Sizderdiń jetistikterińiz jurtty jigerlendirip, jańa bıikterge jeteleıdi, jastarǵa úlgi-ónege bolady. Árqaısyńyzdyń belsendi azamattyq ustanymdaryńyz qoǵamdaǵy kóptegen ózekti máseleni utymdy sheshýge jáne elimizdi jan-jaqty damytýǵa yqpal etedi. Qazaqstan áıelderiniń aqyl-parasaty, erik-jigeri men jasampazdyǵy barlyq qıyndyqty eńserip, syn-qaterlerge tótep berýimizge septigin tıgizýde», - dedi Marat Sultanǵazıev.
Almaty oblysynyń ákimi sondaı-aq oblysta 370 myńǵa jýyq áıel ár salada aıanbaı eńbek etip, óńirdiń damýyna mol úles qosyp kele jatqanyn aıtty.
«Qalyptasqan dástúr boıynsha bilim (26 myńnan astam) jáne medıtsına (11 myńnan astam), halyqty áleýmettik qorǵaý (2 myńǵa jýyq) júıelerin aıaly alaqandy áıeldersiz elestetý múmkin emes. Osyndaı basymdyq qyzmet kórsetý sektorynda da baıqalady. Aýyl sharýashylyǵynda jumys isteıtin adamdardyń besten biri (1/5) áıelderdi qurap otyr. Kásipkerlik salasynda tek byltyrǵy jyldyń ózinde bıznes ıdeıalardy júzege asyrý úshin beriletin qaıtarymsyz 260 granttyń 160-yn áıelder jeńip alǵan.
Búginde oblysymyzda 67 myńnan astam kópbalaly analar bar. Olardyń 18 myńnan astamy «Altyn alqa» jáne «Kúmis alqa» ıegerleri. Osyndaı jandar barlyq qoshemetke laıyq!», - dedi oblys ákimi.
Sonymen qatar Marat Sultanǵazıev 8 naýryz merekesimen áıelder qaýymyn Prezıdent atynan quttyqtaý úshin Іle aýdanyna bardy.
Óńir basshysy Qazaqstan Respýblıkasynyń «Halyq aǵartý isiniń úzdigi», «Mádenıet qaıratkeri» belgisiniń ıegeri, «Almaty oblysynyń jáne Іle aýdanynyń Qurmetti azamaty», ulaǵatty ustaz, áke jolyn qýǵan ánshi Tórtken Kenenqyzynyń shańyraǵyna arnaıy baryp, kelip jetken kóktemniń shýaqty merekesimen quttyqtady.
Jyly shyraı tanytyp qarsy alǵan Tórtken apaı, oblys basshysynyń quttyqtaýyn qýanyshpen qabyl aldy.