Almaty oblysynyń agrokásiporyndary ónimin 10 elge eksporttap otyr
ASTANA.KAZINFORM — Almatyda EAEO Agroónerkásiptik saıasat jónindegi keńesiniń 7-otyrysyna qatysý úshin Qazaqstanǵa kelgen Eýrazııalyq ekonomıkalyq komıssııa, Belarýs jáne Iran ókilderi Almaty oblysynyń jetekshi agroónerkásiptik kásiporyndarynyń jumysymen tanysty. Bul týraly AShM málim etti.
Almaty qalasyna EAEO Agroónerkásiptik saıasat jónindegi keńesiniń 7-otyrysyna qatysý úshin Eýrazııalyq ekonomıkalyq komıssııa Alqasynyń múshesi — Ónerkásip jáne agroónerkásiptik keshen mınıstri Goar Barsegıan, Belarýs Respýblıkasynyń Aýyl sharýashylyǵy jáne azyq-túlik mınıstri ıÝrıı Gorlov, sondaı-aq Iran Islam Respýblıkasynyń Aýyl sharýashylyǵy djıhady mınıstriniń orynbasary Akbar Fathı keldi.
EAEO-ǵa múshe memleketter men Iran delegatsııalary Almaty oblysynyń jetekshi kásiporyndaryn aralady.
EAEO elderiniń ókilderine avtomattandyrý, tsıfrlandyrý, resýrstardy únemdeý, ónimdi tereń óńdeý jáne eksporttyq jetkizilimderdi uıymdastyrý baǵyttaryndaǵy praktıkalyq sheshimder tanystyryldy.
— Bizdiń mindetimiz — aýyl sharýashylyǵy ónimderiniń kólemin arttyrýmen ǵana shektelmeıdi. Ónimdi qaıta óńdeýdi júıeli túrde damytý, qosylǵan quny joǵary ónim óndirý, zamanaýı tehnologııalardy engizý jáne jańa naryqtarǵa shyǵý mańyzdy. Qazaqstannyń aıtarlyqtaı shıkizattyq jáne óndiristik áleýeti bar. Biz ishki naryqty damytý jáne eksport kólemin ulǵaıtý úshin osy áleýetti barynsha tıimdi paıdalanýymyz qajet, — dedi Qazaqstan Respýblıkasynyń Aýyl sharýashylyǵy mınıstri Aıdarbek Saparov iri kompanııalarǵa barý barysynda.
Delegatsııalar barǵan negizgi nysandardyń biri — Ortalyq Azııadaǵy balmuzdaq jáne muzdatylǵan ónim óndiretin iri kásiporyndardyń biri sanalatyn «Shın-Laın» JShS.
30 jyl ishinde kompanııa iri óndiristik keshen qalyptastyryp, búginde 36 brendpen ónimniń 160-tan astam túrin shyǵarady.
Investıtsııa kólemi 64 mlrd teńgeden asady, óndiristik qýaty táýligine 350 tonnadan astam ónimdi quraıdy. Kásiporyn ónimderin Qytaı, Reseı, Belarýs, Ázerbaıjan, Grýzııa, Tájikstan jáne Qyrǵyzstandy qosa alǵanda, 10 elge eksporttaıdy.
Delegatsııalar «GREEN ECO» jylyjaı keshenine de bardy. Munda besinshi býyndaǵy jylyjaı tehnologııasy men gıdroponıka júıesi qoldanylady. Kásiporyn jyl boıy salattar, mıkrokók, salat qospalary jáne jeýge jaramdy gúlderdi qosa alǵanda, ónimniń 30-dan astam túrin shyǵarady. Óndiristik qýaty jylyna shamamen 5 mln qumyra kókónis ósimdikterin quraıdy. Kompanııa óndiris kólemin keńeıtýdi josparlap otyr, jobaǵa 2,1 mlrd teńge ınvestıtsııa salý kózdelgen.
Delegatsııalar saparynyń taǵy bir nysany sharap ónimderin óndirýge mamandanǵan Arba Wine kásiporny boldy.
Kásiporynnyń jalpy aýmaǵy 100 gektardan asatyn júzimdikteri bar.
Kompanııa sharaptyń 24 túrin jáne sıdrdiń 5 túrin shyǵarady. Ónimderin ishki naryqqa ǵana emes, Qytaı, Reseı, Japonııa, Italııa, Shvetsııa jáne Ulybrıtanııaǵa da eksporttaıdy.
Búgin EAEO Agroónerkásiptik saıasat jónindegi keńesiniń 7-otyrysy ótedi. Otyrys Odaqqa múshe memleketterdiń aýyl sharýashylyǵy salasyndaǵy yntymaqtastyǵyn odan ári nyǵaıtýǵa baǵyttalǵan.
Aıta keteıik, Qazaqstannyń halal sertıfıkaty Qatarda resmı tanyldy.
