Almaty oblysyndaǵy jol apaty: qaza tapqan 5 jolaýshy sport ardageri bolǵan

ALMATY. KAZINFORM — Ulttyq Sýrdlımpıada komıtetiniń vıtse-prezıdenti Arsen Shaqýov Almaty oblysynda 7 adamnyń ómirin qıǵan jol apatyna baılanysty jańa derektermen bólisti. 

Onyń aıtýynsha, jantúrshigerlik jol apatynda jan tapsyrǵan 7 azamattyń beseýi sportshy — Sýrdlımpıada ardagerleri bolǵan. 

— Ákemniń jaqyn dostary, Bishkek qalasynda qulaǵynda kemistigi bar ardagerler arasyndaǵy fýtbol týrnırinen qaıtyp kele jatyp, jol apatyna ushyrady. Onda birden 5 ardager qaza tapty, — dedi Arsen Shaqýov.

Ol qaza tapqan sport ardagerleriniń esimin jarııalady:

• Asyl Ibraıymov — estý qabileti buzylǵan sportshylar arasyndaǵy fýtbol jattyqtyrýshysy.

• Dmıtrıı Mochalskıı — shahmattan Sýrdlımpıada chempıony, shahmattan estý qabileti buzylǵan sportshylar arasyndaǵy Eýropa chempıony.

• Sáken Smaǵulov — estý qabileti buzylǵandar arasyndaǵy fýtbol ardageri, estý qabileti buzylǵandar arasyndaǵy fýtboldan ulttyq qurama múshesi.

• Sergeı Volkovınskıı — estý qabileti buzylǵandar arasyndaǵy fýtbol ardageri, estý qabileti buzylǵandar arasyndaǵy fýtboldan ulttyq qurama múshesi.

• Serik Moldashev — estý qabileti buzylǵandar arasyndaǵy fýtbol ardageri, estý qabileti buzylǵandar arasyndaǵy fýtboldan ulttyq qurama múshesi.

Eske salaıyq, Almaty — Bishkek tasjolynda kólik apatynan jeti adam qaza tapty. Polıtsııa málimetinshe, Honda Odissei avtokóliginiń júrgizýshisi alda qozǵalyp bara jatqan HOWO júk kóliginiń tirkemesine soqtyǵysqan. Tártip saqshylary qazir bul derek boıynsha qylmystyq isti tergep jatyr.