Almaty oblysyndaǵy taýly aımaqta qurǵaq shóp órti sóndirilip jatyr
ASTANA. KAZINFORM – Almaty oblysynyń Eńbekshiqazaq aýdanyndaǵy taýly aýmaqta qurǵaq shóp órtenip jatyr. Órtti sóndirý jumystaryna Tótenshe jaǵdaılar mınıstrliginiń avıatsııasy tartyldy.
TJM málimetinshe, órt Baıdibek bı aýylynan 10 shaqyrym jerde ornalasqan Baqtııar saı shatqalyndaǵy memlekettik jer qory aýmaǵynda shyqqan.
Órtti sóndirý jumystaryn Almaty oblysy Tótenshe jaǵdaılar departamentiniń bastyǵy, polkovnık Dáýren Orazbekov úılestirip jatyr.
– Órtti joıýǵa TJM, jergilikti atqarýshy organdar men orman sharýashylyǵynyń 70 qyzmetkeri, 15 tehnıka, sondaı-aq TJM-nyń «Qazavıaqutqarý» avıatsııasy jumyldyryldy, – delingen mınıstrlik habarlamasynda.
TJM avıatsııasy jalpy kólemi 51 tonna sýdy 17 márte tókti.
Qazirgi ýaqytta joǵary temperatýra men jyldamdyǵy sekýndyna 4 metrge deıin jetetin soltústik-batys jel órtti sóndirý jumystaryn qıyndatyp otyr.
Órtti sóndirý jumystary jalǵasyp jatyr. Jaǵdaı Tótenshe jaǵdaılar mınıstrliginiń baqylaýynda.
Aıta keteıik, Aqmola oblysynda naızaǵaı saldarynan qurǵaq shóptiń órtenýi jıiledi.
