Almaty oblysyndaǵy Shelek ózeniniń mańynan qar barysynyń izi anyqtaldy
ALMATY. KAZINFORM – «Kólsaı kólderi» ulttyq parkiniń ınspektorlary Shelek ózeniniń mańynda qar barysynyń izin anyqtaǵan.
«Kólsaı kólderi» memlekettik ulttyq tabıǵı parkiniń Taýshelek ormanshylyǵy aýmaǵynda, Shelek ózeniniń boıynda memlekettik ınspektorlar Omar Ámirıev pen Dúısen Keldáýlet kezekti reıd barysynda Qazaqstannyń Qyzyl kitabyna engen janýardyń izin, sondaı-aq taýtekeler men buǵy-maraldardy uıaly telefonǵa túsirip alǵan.
– Mundaı kadrlar – ulttyq parktiń tabıǵı baılyǵy saqtalyp, janýarlar áleminiń turaqty mekendep jatqanyn kórsetedi. Tabıǵatty qorǵaý – barshamyzdyń ortaq mindetimiz, - delingen beınejazba málimdemesinde.
Sondaı-aq ulttyq tabıǵı parkinde júrgizilgen basqa reıd kezinde memlekettik ınspektor Aıbol Bektursyn Mystóbe aýmaǵynda erkin jaıylyp júrgen jabaıy elikti jáne Birinshi kóldiń mańynda úırekter tobyn kameraǵa túsirip alǵan.
Eske salaıyq, keıingi jyldary elimizde qar barysynyń sany artqan.
