Almaty oblysyndaǵy saıajaıda turatyn turǵyndardyń máselesi qalaı sheshiledi

Almaty oblysynda 333 saıajaı jaqyn mańdaǵy eldi mekenderge qosylyp, bas jospary jasalyp jatyr. Bul týraly Almaty oblysynyń ákimi Marat Sultanǵazıev aıtty, dep habarlaıdy Kazinform. 

«Almaty aglomertsııasyna kiretin aýdandarǵa tán taǵy bir másele – saıajaılar máselesi. Ol kóp jyldan beri sheshimin tappaı keledi. Sebebi saıajaılar maýsymdyq sıpattaǵy úıler bolǵandyqtan ınfraqurylym júrgizilmegen. Jyl 12 aı turýǵa arnalmaǵan 674 saıajaılarda búginde 188 myń adam turady. Olarda eldi meken mártebesi bolmaǵandyqtan standarttarǵa saı joldarmen, sýmen, káriz júıesimen, gazben, kóshelerdi jaryqtandyrýmen qamtamasyz etý múmkin emes. Oblys boıynsha shyǵatyn synı aqparattar saıajaılarǵa baılanysty», - dedi óńir ákimi Ortalyq kommýnıkatsııalar qyzmetindegi brıfıngide.

Onyń atap ótýinshe, bul máseleni júıeli túrde sheshý úshin 333 saıajaıdy jaqyndaǵy eldi mekenderge qosý jóninde sheshim qabyldanǵan. Qazirgi ýaqytta olardyń jańa bas josparlary jasalyp jatyr. Osydan keıin kezeń-kezeńmen ınfraqurylym júrgizý qolǵa alynady.

«Almaty aglomeratsııasynyń eldi mekenderin, onyń ishinde saıajaılardy avtobýs qatynasymen tolyq qamtý maqsatynda kommýnaldyq avtobýs parki quryldy. Bıyl barlyǵy 37 eldi mekendi qamtıtyn 12 jańa marshrýt ashyldy. Onyń ishinde 4-eýine memlekettik avtopark qyzmet kórsetedi. Byltyr sýbsıdııa kólemi 200 mln teńge bolsa, bıyl 1,3 mlrd teńgege deıin kóterildi. Bul áleýmettik baǵyttardyń sanyn 59-ǵa jetkizýge múmkindik berdi. Sonymen qatar mektep oqýshylaryn tasymaldaý úshin bıyl qosymsha 34 avtobýs satyp alyndy», - dedi Marat Sultanǵazıev.