Almaty oblysyndaǵy negizgi gıdrotehnıkalyq nysandardy qaıta jańǵyrtýdyń jol kartasy ázirlendi
ASTANA. KAZINFORM - Almaty oblysyna jumys sapary aıasynda Sý resýrstary jáne ırrıgatsııa mınıstri «Qazsýshar» RMK-nyń «D. Qonaev atyndaǵy Úlken Almaty kanaly» fılıalynyń ujymymen keńes ótkizdi, dep habarlaıdy QR Sý resýrstary jáne ırrrıgatsııa mınıstrliginiń baspaóz qyzmeti.
Sý sharýashylyǵy vedomstvosynyń basshysy vegetatsııa kezeńiniń qorytyndylary jáne óńirdiń sý ınfraqurylymyn damytý jobalarynyń barysy týraly baıandamalardy tyńdady.
Búginde mınıstrdiń tapsyrmasy boıynsha fılıaldyń qaramaǵyndaǵy nysandardy rekonstrýktsııalaý jáne jańǵyrtý jónindegi jol kartasy ázirlendi. Onda 37 is-shara kózdelgen.
Josparlanǵan jumystardyń qatarynda Kúrti ózenindegi Oń jaǵalaý jáne Sol jaǵalaý magıstraldyq kanaldaryn, Qoram magıstraldyq kanalyn jáne Úlken Almaty kanalynyń 15,6 shaqyrymyn rekonstrýktsııalaý jumystary bar.
Qazirgi ýaqytta osy tórt joba boıynsha memlekettik saraptamanyń oń qorytyndysy alyndy. Shelek ózenindegi Bartoǵaı sý qoımasynyń bógetin rekonstrýktsııalaýǵa arnalǵan joba qujatyn ázirleý aıaqtalyp keledi. Kúrti sý qoımasynyń bógetin, Tasqutan sý kóterý qurylysyn, Shelek gıdrotorabyn, sondaı-aq Úlken Almaty kanalynyń bas qurylysyn jáne 110 shaqyrymyn rekonstrýktsııalaýdy kózdeıtin bes jobany ázirleý jumystary bastaldy.
Sonymen qatar qalǵan jobalardy ázirleý jumystary da júrgizilip jatyr. Osylaısha, jańǵyrtý jumystary «D. Qonaev atyndaǵy Úlken Almaty kanaly» fılıalynyń qaramaǵyndaǵy barlyq sý sharýashylyǵy nysanyn qamtıdy. Baıandamalardy tyńdaǵan Nurjan Nurjigitov kanaldar arqyly sýarmaly sýdy jetkizý boıynsha sapaly qyzmet kórsetý qajettigin atap ótti.
-Fılıal kórsetiletin qyzmetterdiń sapasyn arttyrýy qajet. Ol úshin ınfraqurylymdyq jobalardyń ýaqytyly ári adal iske asyrylýyn qamtamasyz etý, túsindirý is-sharalaryn belsendirek ótkizý jáne azamattardyń ótinishterine jedel jaýap berý qajet. Mınıstrlik tarapynan tıimdi jumys isteý úshin barlyq jaǵdaı jasalǵan: gıdrotehnıkalyq nysandardy salý jáne rekonstrýktsııalaý jobalary qoldaý taýyp, jańa tehnıka usynylyp, mamandardyń jalaqysy kóterilip jatyr, sý jetkizýge elektrondyq sharttar jasasý júıesi engizildi, – dedi Sý resýrstary jáne ırrıgatsııa mınıstri.
Almaty oblysyna jumys sapary barysynda Nurjan Nurjigitov Talǵar ózeni arqyly ótetin «Úlken Almaty kanaly mańyndaǵy» avtomobıl jolyndaǵy kópirdi rekonstrýktsııalaý jumystarynyń barysymen de tanysty.
Qurylys-montaj jumystary aıaqtalǵannan keıin nysannyń uzyndyǵy shamamen 120 metr, eni shamamen 12 metr bolady. Mınıstr Talǵar ózeniniń arnasyn rekonstrýktsııalaý jobasyn ázirleýdi jáne ony jergilikti atqarýshy organdar júzege asyryp jatqan kópirdi qaıta jańǵyrtý jobasymen biriktirýdi tapsyrdy.
-Sondaı-aq «D. Qonaev atyndaǵy Úlken Almaty kanaly» fılıalynyń qaramaǵyndaǵy tórt qubyrly dıýkerdiń qaýipsizdigin qamtamasyz etý boıynsha jumystar júrgizý tapsyryldy. Uzyndyǵy 646,6 metr bolatyn dıýker sekýndyna 58,5 tekshe metrge deıin sý ótkize alady jáne Almaty oblysynyń Talǵar aýdanyn jáne Almaty qalasyn sýmen qamtamasyz etedi,-delingen habarlamada.
Sý resýrstary mınıstrligi Úlken Almaty kanalyn betondaý boıynsha joba ázirlep jatyr.
