Almaty oblysyndaǵy «Barys» bazarynyń 30 paıyzy memleketke qaıtarylǵan

QONAEV. KAZINFORM — Almaty oblysynda «Barys» bazaryn tolyq memleket menshigine qaıtarý boıynsha jumys júrip jatyr.

Qarasaı aýdany prokýratýrasy qazirgi ýaqytta avtokólik bazarynyń 11 gektar aýmaǵy, ıaǵnı 30 paıyzy memleket ıeliginde ekenin málimdedi. Qalǵan 25,5 gektar jer ýchaskesiniń menshik ıesi — «Auto market Karasay» JShS.

— Qarasaı aýdandyq sotynyń sheshimimen «Barys» avtokólik bazarynyń 36,5 ga aýmaǵynan 11 ga bóligi memleket menshigine qaıtaryldy. Qalǵan bóligin memleket menshigine qaıtarý boıynsha aýdan prokýratýrasymen sotqa talap aryz joldandy, — delingen prokýratýra málimdemesinde.

Eske salaıyq, buǵan deıin Almaty oblysynyń ákimi Marat Sultanǵazıev Almaty qalasyna jaqyn ornalasqan «Barys» avtokólik bazarynyń bolashaǵyna qatysty pikir bildirdi.

— Eger biz isti jeńip, 36 gektardan astam jer telimin oblys qaramaǵyna qaıtara alsaq, bul jerde ónerkásiptik ındýstrııalyq aımaq qurý josparda bar, — dedi ol.

2023 jyly sot «Barys» avtokólik bazarynyń jer ýchaskelerin satyp alý-satý shartyn jaramsyz dep tanyǵan bolatyn.