Almaty oblysyndaǵy avtovokzal jabyldy ma — ákimdik jaýap berdi

ALMATY. KAZINFORM — Almaty oblysynyń ortalyǵy Qonaev qalasynda ornalasqan avtovokzalǵa turǵyndar shaǵymdandy. Bul týraly beınejazba áleýmettik jelilerde tarady.

Qonaev qalasynyń turǵyny qaladaǵy avtovokzaldyń jazý alynyp tastalǵanyna jáne jolaýshylarǵa jaǵdaı jasalmaǵanyna shaǵymdandy.

«Burynǵy avtovokzaldyń janynda turmyn. Qazir onyń jazýyn da alyp tastapty. Endi Almaty oblysynyń oblystyq ortalyǵynda avtovokzal da, dárethana da joq. Eshqandaı jaǵdaı jasalmaǵan» — delingen beınejazba.

Qonaev qalasynyń baspasóz qyzmeti resmı jaýabynda aıtylǵan meken-jaı boıynsha jolaýshylar tasymaly júrip turǵanyn jáne jolaýshylardyń ǵımarat ishine erkin kirip-shyǵa alatyndaryn habarlady.

«Búgingi tańda qalaaralyq jáne Qonaev qalasy boıynsha qala mańyndaǵy jolaýshylar tasymaly «Qapshaǵaı» jolaýshylarǵa qyzmet kórsetý pýnktinde kórsetiledi (burynǵy avtovokzal). Ǵımarattyń aýdany 400 m². Bul jolaýshylarǵa qyzmet kórsetý pýnkti jeke menshik «Jedel» JShS-na tıesili. Jolaýshylar aǵyny az bolýyna baılanysty 2023 jyldyń jeltoqsanynda avtovokzal — jolaýshylarǵa qyzmet kórsetý pýnkti retinde qaıta tirkeldi. Osyǵan baılanysty ǵımarat qasbetinen jazýlar alynyp tastaldy. Alaıda, qalaaralyq reıster pýnkt aýmaǵynda da jumysyn jalǵastyra beredi» — dep habarlaıdy Qonaev qalasynyń baspasóz qyzmetinen.