Almaty oblysyndaǵy avtobýs apaty: 34 adam zardap shekken
«Qaıyńdy-Saty» jolyndaǵy apattan zardap shekken 34 adamnyń jaǵdaıy belgili boldy, dep habarlaıdy QazAqparat tilshisi.
«Jol apaty saldarynan 36 jastaǵy jolaýshy oqıǵa ornynda kóz jumdy. 34 adam zardap shekti. Onyń 20-sy áıel,14-i er adam. Barlyq zardap shekkenderge algorıtm boıynsha tolyq kólemde jedel medıtsınalyq kómek kórsetildi .Oqıǵa ornyna 13 jedel járdem brıgadasy jáne 1 TMQK brıgadasy (28 qyzmetker jáne 14 sanıtarııalyq avtokólik) jiberildi. Kegen aýdandyq aýrýhanasynda 1, Shelek aýylynyń aýdandyq aýrýhanasyna 2, Almaty kópsalaly klınıkalyq aýrýhanasyna 9 naýqas em qabyldap jatyr, jaǵdaılary ortasha aýyr», - dep habarlady Almaty oblysy ákimdiginiń baspasóz qyzmetinen.
Ákimdiktegiler apattyń barlyq mán-jaıyn obektıvti zertteýge baǵyttalǵan saraptama taǵaıyndaýmen qajetti tergeý áreketteri júrgizilip jatqanyn atap ótti.
Avtobýs júrgizýshisi Kegen aýdany ýaqytsha ustaý ızolıatoryna qamaldy. Іsti oblystyq polıtsııa bastyǵy men Almaty oblysynyń ákimi baqylaýǵa aldy.
Buǵan deıin 5 qazan kúni Kegen aýdany Saty aýyly aýmaǵyndaǵy «Qaıyńdy-Saty» taýly avtojolynyń 9-shy shaqyrymynda 47 jastaǵy avtobýs júrgizýshisi qarsy baǵyttaǵy qozǵalysqa shyǵyp, 1997 jyly týǵan O. esimdi azamat basqaryp kele jatqan «ÝAZ» avtokóligimen betpe-bet soqtyǵysqany týraly jazǵan bolatynbyz.
