Almaty oblysynda júk kólikteriniń qozǵalysyna ýaqytsha shekteý qoıyldy
ASTANA. KAZINFORM — Almaty oblysynda júk kólikteri úshin aınalma jol uıymdastyryldy, dep habarlaıdy «QazAvtoJol» UK baspasóz qyzmeti.
2026 jylǵy 3 qyrkúıek saǵat 13:00-den bastap Almaty oblysynda ortasha jóndeý jumystarynyń júrgizilýine baılanysty KZ05-10 «Almaty – Tóńkeris – Baıserke – Mejdýrechenskoe – «Astana – Almaty» avtomobıl jolynyń 20-shaqyrymynan (Kókterek aýyly) 51-shaqyrymyna (Aqsaı aýyly) deıingi aralyqta júk kólikteriniń qozǵalysyna ýaqytsha shekteý engizildi.
Atalǵan ýchaskede júrgizilip jatqan jóndeý jumystaryna baılanysty kólik quraldary úshin ýaqytsha aınalma jol uıymdastyryldy. Aınalma baǵyt respýblıkalyq mańyzy bar «Almaty – Qonaev», «Qonaev – Qurty», «Almaty – Shelek – Qorǵas» jáne jergilikti mańyzy bar «Baıserke – Álı» avtomobıl joldary arqyly júzege asyrylady.
– Joldy 2026 jylǵy 30 qyrkúıekte ashý josparlanǵan. Júrgizýshilerden qozǵalys baǵytyn aldyn ala josparlap, jol belgileri men ýaqytsha qozǵalys syzbasyn saqtaýǵa shaqyramyz, – delingen kompanııa taratqan aqparatta.
1403 baılanys ortalyǵyna habarlasyp, táýlik boıy qosymsha aqparat alýǵa bolady.
Buǵan deıin Astanada Tilendıev dańǵylynyń bir bóligi 10 kúnge jabylǵanyn jazǵanbyz.
