Almaty oblysynda JRVI juqtyrǵandar sany artty

Oblystyq sanıtarııalyq-epıdemıologııalyq baqylaý departamentiniń málimetinshe, naýqastar sanynyń ósýine qaramastan, óńirdegi epıdemıologııalyq jaǵdaı turaqty.

- Naýqastardyń 1 003-i nemese 41%-y – 14 jasqa deıingi balalar. Syrqattaný kórsetkishi 100 myń turǵynǵa shaqqanda 148,43 jaǵdaıǵa teń. Ótken jyldyń sáıkes kezeńinde JRVI-diń 1 975 jaǵdaıy tirkelgen. Al ázirge óńirde maýsymdyq tumaý juqtyrǵandar anyqtalǵan joq, – dep habarlady vedomstvonyń baspasóz qyzmeti.

Qazir JRVI juqtyrǵan 48 naýqas aýrýhanaǵa jatqyzylǵan. Naýqastar klınıkalyq kórsetkishterge sáıkes aýrýhanaǵa ornalastyrylady.

Epıdemıologııalyq maýsymǵa oraı oblysta 301 tósek-oryn daıyndalǵan. Qajet bolǵan jaǵdaıda JRVI men tumaýdyń aýyr túrine shaldyqqan naýqastarǵa arnap qosymsha 246 ınfektsııalyq tósek-oryn ashýǵa bolady.

Qazir qandaı vırýstar taralyp jatyr?

Departamenttiń málimetinshe, zerthanalyq monıtorıng nátıjeleri boıynsha osy maýsymda anyqtalǵan respıratorlyq vırýstardyń ishinde rınovırýs basym. Onyń úlesi – 55%. Sondaı-aq RS-vırýs (29%), koronavırýs (8%), paragrıpp (6%) jáne metapnevmovırýs (2%) anyqtalǵan.

Tumaýǵa qarsy qansha adam ekpe aldy?

Bıyl epıdemıologııalyq maýsymǵa arnap Almaty oblysynyń jergilikti bıýdjeti esebinen «Grıppol» vaktsınasynyń 110 myń dozasy satyp alynǵan. Buǵan qosa, taǵy 50 myń doza vaktsınaǵa ótinim berilgen.

Vaktsınatsııa 1 qazanda bastaldy. Búginge deıin 26 776 adam ekpe alǵan. Jalpy, 160 myń turǵyndy vaktsınamen qamtý josparlanǵan.

Aýrýdyń aýyr ótýi men asqyný qaýpi joǵary jekelegen sanattaǵy azamattarǵa tumaýǵa qarsy ekpe tegin salynady. Olardyń qatarynda balalar, júkti áıelder, qart adamdar, sozylmaly aýrýlary bar azamattar, medıtsına qyzmetkerleri, sondaı-aq keıbir áleýmettik mekemelerdiń qyzmetkerleri men qamqorlyǵyndaǵy adamdar bar.

Qalǵan turǵyndar ekpeni óz qarajatyna nemese jumys berýshiniń esebinen ala alady. Kásiporyn qyzmetkerlerine vaktsına salý úshin kóshpeli brıgadalar uıymdastyrylýy múmkin.

Oqýshylar qashan qashyqtan oqýǵa kóshirilýi múmkin?

Bilim berý uıymdarynda da aldyn alý sharalary júrgizilip jatyr. Balabaqshalarda, mektepter men kolledjderde kún saıyn tańerteńgi medıtsınalyq tekserý uıymdastyrylady. JRVI belgileri bar balalar men qyzmetkerler sabaqqa jáne jumysqa jiberilmeıdi.

Eger bir synyptaǵy oqýshylardyń 20-30%-y aýyrsa, kabınet júıesi jeti kúntizbelik kúnge toqtatylady. Bul ýaqytta oqýshylar bir kabınette otyryp, basqa bólmelerge aýyspaıdy.

Al synyptaǵy nemese toptaǵy oqýshylardyń 30%-y nemese odan kóbi aýyrǵan jaǵdaıda, olar qashyqtan oqytý formatyna kóshiriledi. Mektepke deıingi uıymdarda tıisti toptyń oqý-tárbıe protsesi ýaqytsha toqtatylady.

Medıtsınalyq uıymdarda qandaı sharalar qabyldandy?

1 qazannan bastap medıtsınalyq uıymdardyń qyzmetkerleri qorǵanysh maskalaryn mindetti túrde taǵýy kerek. Emhanalarda JRVI jáne tumaý belgileri bar naýqastardy qabyldaý úshin jeke súzgiler uıymdastyrylǵan.

Naýqastarǵa úıde medıtsınalyq kómek kórsetý úshin mobıldi brıgadalar qurylǵan. Tynys joldarynyń ınfektsııasy belgileri bar júkti áıelder men bir jasqa deıingi balalarǵa erekshe kóńil bólinedi.

Mamandar JRVI, tumaý jáne COVID-19 boıynsha jaǵdaıdy aýmaqtar, jas sanattary men qaýip toptary bólinisinde kún saıyn baqylap otyrady. Mektep oqýshylary arasyndaǵy syrqattanýshylyq ta jeke taldanady.

Turǵyndarǵa qoldy únemi jýý, antıseptıkterdi paıdalaný, medıtsınalyq uıymdarǵa barǵanda maska taǵý jáne aýrýdyń alǵashqy belgileri baıqalǵanda úıde qalý usynylady.

- Vırýstyq aýrýdyń alǵashqy belgileri paıda bolǵanda, eń bastysy – jaýapkershilik tanytyp, úıde qalý. Óz betińizshe emdelmeńiz jáne aınalańyzdaǵy adamdarǵa qaýip tóndirmeńiz, – dep eskertti departament ókilderi.

Eske salsaq, Almatyda JRVI men tumaý juqtyrý kórsetkishi 40 paıyzǵa tómendegeni habarlandy.