Almaty oblysynda jóndelmegen jolǵa narazy turǵyndar tasjoldy jaýyp tastaǵan
QONAEV. KAZINFORM — Keshe Almaty oblysynyń turǵyndary «Kegen-Narynqol» jolyn jaýyp tastady.
Turǵyndar qomaqty qarajat bólingen joldyń jóndelmeı jatqanyna narazy. Olardyń aıtýynsha, QazAvtoJol ulttyq kompanııasynan 7,9 mlrd teńgeniń tenderin jeńgen merdiger «Nurly Jol-7» JShS tıisti jumystardy bastamaı otyr.
QazAvtoJol kompanııasynyń resmı jaýabyna sáıkes, Almaty oblysynda respýblıkalyq mańyzy bar «Kegen-Narynqol» avtojolynyń 0-74 shaqyrym aralyǵynda ortasha jóndeý jumystaryn júrgizý úshin 2025 jyldyń kókteminde merdiger anyqtalǵan. Jobany júzege asyrý 2025–2026 jyldarǵa josparlanǵan.
— Qazirgi ýaqytta merdiger jol-qurylys jumystaryna daıyndyq sharalaryn júrgizip jatyr. Nysanǵa 30-dan astam arnaıy jol-qurylys tehnıkasy men 45 jumysshy jumyldyryldy. Merdiger tarapynan usatý-qumdaý qondyrǵysy iske qosyldy. Saǵatyna 160 tonna ónim shyǵaratyn asfaltbeton zaýytynyń montajdaý jumystary aıaqtalýǵa jaqyn. Asfaltbeton zaýytynyń iske qosý jumystaryn 2025 jylǵy 20 shildege deıin aıaqtaý josparlanyp otyr, — dep habarlady kompanııadan.
Odan bólek QazAvtoJol jaýabynda usatý-qumdaý jabdyqtaryn ornatý jumystary júrgizilip jatqany aıtylǵan. Jaqyn arada taǵy eki usatý-qumdaý qondyrǵysy qosylmaq.
— Óńirdiń kúrdeli klımattyq jaǵdaılaryn jáne jaýyn-shashynnyń jıi túsý yqtımaldyǵyn eskere otyryp, asfaltbeton zaýyty paıdalanýǵa berilgenge deıin jol jamylǵysyn ashý jumystaryn bastamaý týraly sheshim qabyldandy. Bul jer tóseminiń ylǵaldanýyn boldyrmaýǵa jáne jumystyń odan ári oryndalýyna kedergi keltirmeýge baǵyttalǵan, — delingen jaýapta.
Sonymen qatar QazAvtoJol kompanııanyń Almaty oblystyq fılıaly jergilikti turǵyndarmen birneshe ret kezdesý uıymdastyryp, aldaǵy jol jóndeý jumystarynyń kezeńderi men jospary týraly túsindirme jumystaryn júrgizgenin habarlady.
Eske salaıyq, buǵan deıin Almatydaǵy Abaı dańǵyly Úlken Almaty aınalma avtomobıl jolyna deıin qashan uzartylatynyn jazǵanbyz.