Aqtóbede apatty dep tanylǵan úıdegi páterlerdi banktegi kepilden shyǵarý qıynǵa soǵyp tur

AQTÓBE. KAZINFORM – Eset batyr turǵyn alabyndaǵy bes qabatty eki úıdiń biri memlekettik mekeme balansyna ótti. Ekinshi úıde páter ıesi jyljymaıtyn múlkin bankke kepilge qoıyp, ony bosatý jumysy áli jalǵasyp jatyr.

Aqtóbe qalasy ákiminiń baspasóz qyzmetiniń habarlaýynsha, Almaty aýdany Eset batyr turǵyn alabyndaǵy № 39 «K», № 40 «K» úıleri eki jyldan beri bos tur. «Nurly jer» baǵdarlamasymen úı salǵan qurylys kompanııasynyń basshylary men tehnıkalyq baqylaýshylar byltyr sottaldy. Olar 5 jáne 6 jylǵa bas bostandyǵynan aıyryldy.

Sot úkimi zańdy kúshine engen soń Aqtóbe qalalyq qurylys bólimi eki úıdi de turǵyn úı qatynastary bóliminiń balansyna ótkizýi kerek. 

- Turǵyndardyń páteri bankte, ózge de qarjy ınstıtýttarynda kepilde boldy. Ár páterdiń qujatyn tekserip, kepilden tolyq bosatý ońaıǵa soqpady. Jaqynda ǵana eki úıdiń biriniń qujaty tolyq rásimdelip, úı qalalyq turǵyn úı qatynastary bóliminiń balansyna ótti. Endi qalalyq turǵyn úı qatynastary bólimi ekonomıka jáne qarjy bólimine hat daıyndaıdy. Qalalyq ekonomıka jáne qarjy bólimi ókim shyǵaryp, úıdi qurylys bóliminiń balansyna beredi. Sodan soń súrý týraly qujat daıyndalady. Al ekinshi úıdegi bir páter bankke kepilge qoıylǵan. Qazir zańgerler jumys istep jatyr,- dedi Aqtóbe qalasy ákiminiń baspasóz qyzmeti

Aıta keteıik, 5 qabatty eki úıdiń turǵyndary 2023 jyly kóshirilip, jańa úıge qonystandy.