Almaty oblysynda jolǵa jaqyn qazylǵan karer jumysy ýaqytsha toqtaldy

QONAEV. KAZINFORM — Almaty oblysy Báıterek aýylynyń turǵyndary karer kólik júretin jolǵa tym jaqyn jerde qazylyp jatqanyn aıtyp shaǵymdandy.

Turǵyndar shaǵymy áleýmettik jelide jarııalandy.  Odan Kamenıstaıa kóshesinde tereń qazylǵan karerde tehnıkanyń tynymsyz jumys istep jatqanyn kórýge bolady.

Almaty oblysy ákimdiginiń málimetinshe, «HanElıtStroı» JShS Eńbekshiqazaq aýdany, Báıterek aýylyndaǵy ken ornynan qumdy-gravıı qospasyn óndiredi. Jelidegi shaǵymnan keıin Eńbekshiqazaq aýdany ákimishiliginiń tapsyrmasymen jergilikti kásipkerlik bóliminiń, aýdan ákimdiginiń jáne polıtsııa ókilderinen turatyn jumys toby oqıǵa ornyna dereý jetken.

— Tekserý júrgizilip, kásiporyn basshylyǵy túsindirý jumystaryn júrgizdi. Jer qazý jumystarynyń shekaralary anyqtalǵanǵa deıin karerdiń jumysy ýaqytsha toqtatyldy. Sonymen qatar ákimshilik oqıǵa ornynda kezekshilik uıymdastyryp, turǵyndarǵa túsindirý jumystaryn ótkizdi, — dep habarlady ákimdikten.

Eske salaıyq, buǵan deıin Almaty oblysynda 446 jer ýchaskesi paıdalanylmaı jatqanyn jazǵanbyz.