Almaty oblysynda joldardy Úlken Almaty aınalma jolyna jalǵaý úshin jer telimderi alynady
QONAEV. KAZINFORM — Bıyl Almaty oblysynda memleket muqtajyna qajet jer telimderin satyp alýǵa 5,8 mlrd teńge jumsalady.
Kazinform saýalyna jaýap bergen Almaty oblysy jer qatynastary basqarmasynyń basshysy Amanjol Ábdirahmanovtyń aıtýynsha, 2026 jyly óńirdegi birneshe joba úshin jer telimderin májbúrli túrde alý josparlanyp otyr:
— Qarasaı jáne Іle aýdandaryndaǵy Úlken Almaty aınalma avtokólik jolyna (ÚAAAJ) shyǵatyn alty radıatorlyq joldyń qurylysy;
— Almaty–Bishkek tas jolyndaǵy (24+750 km) «taǵa» úlgisindegi kólik aıryǵy jobasy;
— Almaty metropolıteniniń úshinshi kezegi — Qarasaı aýdanyndaǵy «Qalqaman» stantsııasynan «Barlyq» bazaryna deıingi jeli qurylysy.
— Atalǵan jobalardy júzege asyrý úshin Qarasaı jáne Іle aýdandarynyń aýmaǵynda jol qurylysyna túsetin 89 jer telimi memleket menshigine alynady. Bul Almaty qalasy men Almaty oblysynyń eldi mekenderi arasyndaǵy turaqty kólik baılanysyn qamtamasyz etýge, jol júrý ýaqytyn qysqartýǵa, qoldanystaǵy kóshe-jol jelisiniń júktemesin azaıtýǵa, sondaı-aq qozǵalys qaýipsizdigi men sapasyn arttyrýǵa múmkindik beredi, — dedi ol.
Vedomstvo basshysynyń jaýabyna sáıkes, 2026 jyly jer telimderin memleket muqtajyna satyp alý úshin shamamen 5,8 mlrd teńge bólingen. Al byltyr Qarasaı aýdanynda 5,7 mlrd teńgege 101 jer telimi satyp alynǵan.
Sonymen qatar oblysta paıdalanylmaı jatqan aýyl sharýashylyǵy jerlerin memleket menshigine qaıtarý jumystary júrip jatyr. 2025 jyly jalpy aýdany 91,1 myń gektar bolatyn 298 ýchaske qaıtarylǵan. Onyń ishinde 15,7 myń gektary sot tártibimen, al 75,4 myń gektary erikti túrde qaıtarylǵan.
Eske salaıyq, buǵan deıin Almaty-Qaskeleń jáne Almaty-Talǵar joldary qashan keńeıtiletinin jazǵanbyz.
