Almaty oblysynda jolda kókpar oınaǵan azamat jazalandy

QONAEV. KAZINFORM - Almaty oblysynyń Eńbekshiqazaq aýdanynyń №2 sotynda QR Ákimshilik quqyq buzýshylyq týraly kodeksiniń 434-babynyń 1-bóligi boıynsha E.-ge qatysty is qaraldy.

Sot málimetine sáıkes, bıyl 22 naýryz kúni saǵat 16:20-da aıyptalýshy Taýqaraturyq aýylynda júrip, Úlken Almaty kanaly tasjolynda kókpar oınaǵan. Osylaısha, ol azamattardyń qoǵamdyq tártibi men tynyshtyǵyn buzǵan.

Sot otyrysynda E. kinásin moıyndap, quqyq buzýshylyq faktisin rastady, qatań jazalamaýdy surady. 

— Qazaqstan Respýblıkasynyń Ákimshilik quqyq buzýshylyq týraly kodeksiniń 434-babynyń 1-bóligimen E. kináli dep tanylyp, oǵan osy bap boıynsha 20 AEK aıyppul salyndy, - dep habarlady Eńbekshiqazaq aýdanynyń № 2 aýdandyq sotynyń baspasóz qyzmeti.

Qaýly zańdy kúshine engen joq. 

Eske salaıyq, byltyr Almaty oblysynda jol boıynda kókpar tartqandar jazalanǵanyn jazǵanbyz.