Almaty oblysynda jolaýshy polıtseılerge tap berip, soqqyǵa jyqqan

ALMATY. KAZINFORM — Almaty oblysynyń polıtsııa departamenti qyzmet barysynda tártip saqshylaryna shabýyl jasaǵan er adamnyń ustalǵanyn habarlady.

— 12 maýsymda ákimshilik ýchaskeni patrýldeý kezinde jol tańbalaý erejesin saqtamaǵany úshin Mercedes Benz kóligin basqarǵan jergilikti turǵyn toqtatyldy. Avtokólik júrgizýshisiniń qujattaryn tekserý barysynda jolaýshy retinde júrgen 20 jastaǵy er adam polıtsııa qyzmetkerine dene jaraqatyn keltirdi. Kúdikti ustalyp, ýaqytsha ustaý ızolıatoryna qamaldy, — dep habarlaıdy oblystyq PD.

Sondaı-aq departamenttiń baspasóz qyzmeti atalǵan jaǵdaıǵa oraı bılik ókiline kúsh kórsetý faktisi boıynsha qylmystyq is qozǵalǵanyn málimdedi. 

Bolǵan oqıǵanyń mán-jaıy men sebepterin anyqtaý úshin tergeý jumysy júrip jatyr.

Eske salaıyq, buǵan deıin almatylyq polıtseılerdiń megapolıstegi veıp dúkenderge reıd jasaǵanyn jazǵan edik.