Almaty oblysynda jol opyrylyp, 3 metrdeı shuńqyr paıda boldy
QONAEV. KAZINFORM — Almaty oblysyndaǵy aýyldardyń birinde jol opyryldy.
Jol ústindegi tereń shuńqyrdyń beınejazbasy áleýmettik jelide tarady.
Atalǵan derekke qatysty Eńbekshiqazaq aýdanynyń ákimdigi jaýap berdi. Resmı málimetke sáıkes, 6 mamyr saǵat 07:45–te Baltabaı aýyldyq okrýgine qarasty Aqtoǵan aýylynyń Samal kóshesinde jergilikti mańyzy bar joldyń opyrylyp túskeni týraly habarlama túsken. Opyrylǵan jerdiń tereńdigi men eni shamamen 2–3 metrdeı bolǵan.
Aýdan ákimdigi 1960-jyldary bul ýchaskede «Esik dendrologııalyq parki» RMQK-nyń ortalyq jınaqtaýshy rezervýary ornalasqanyn málimdedi.
— Keıin rezervýar beton plıtamen jabylyp, ústine topyraq tógilgen. Ol kezde bul aýmaq bos jatqan jer bolatyn. 2009 jyly bul jer telimderi jeke turǵyn úı qurylysy úshin berilip, qazirgi ýaqytta munda eldimeken paıda boldy. Ýaqyt óte kele rezervýar ústindegi beton plıtanyń qulaýyna jol tósemi shógip, sonyń áserinen shuńqyr paıda bolǵan, — delingen jaýapta.
Sondaı-aq Eńbekshiqazaq aýdanynyń ákimdigi shuńqyr anyqtalǵan sátte jol eki jaǵynan jabylyp, avtokólikter úshin aınalma jol uıymdastyrylǵanyn habarlady. Dál qazirgi ýaqytta joldy qalpyna keltirý jumystary aıaqtalǵan.
Eske salaıyq, byltyr Almatyda jol jabyny opyrylyp, 13 avtokólik zaqymdandy.
