Almaty oblysynda jol apatynan 4 adam qaza tapty

QONAEV. KAZINFORM – Polıtsııa Almaty – Kókpek – Kóktal – Shonjy avtojolynyń 80-shaqyrymynda bolǵan jol apaty boıynsha qylmystyq is qozǵady.

Almaty oblysy polıtsııa departamentiniń málimetinshe, jol apaty 2025 jylǵy 5 jeltoqsanda bolǵan. 

Audi A6 avtokóliginiń júrgizýshisi rólge ıe bola almaı, qarsy baǵytqa shyǵyp, Nissan Cefiro kóligimen soqtyǵysqan.

– Jol apatynan eki júrgizýshi jáne eki jolaýshy oqıǵa ornynda alǵan jaraqattarynan kóz jumdy. Taǵy úsh jolaýshy túrli dene jaraqatymen aýrýhanaǵa jetkizildi, - delingen vedomstvo taratqan habarlamada.

Qazirgi ýaqytta qaıǵyly oqıǵanyń barlyq mán-jaıyn anyqtaý úshin sotqa deıingi tergeý áreketteri júrip jatyr.

Tergeýdi polıtsııa departamenti basshylyǵy baqylaýǵa alǵan.

Eske salaıyq, buǵan deıin Almaty – Bishkek tasjolynda kólik apatynan 7 adam qaza tapqan edi. Honda Odissei avtokóliginiń júrgizýshisi alda qozǵalyp bara jatqan HOWO júk kóliginiń tirkemesine soqtyǵysqan.

Keıinirek qaza tapqan 7 adamnyń beseýi sportshy ekeni habarlandy.