Almaty oblysynda joǵalǵan 74 jastaǵy shopan tabyldy

QONAEV. KAZINFORM — Almaty oblysynda mal jaıýǵa shyǵyp, adasyp ketken 74 jastaǵy er adam aman - esen tabyldy.

23 aqpanda saǵat 22:30-da Almaty oblysynyń Tótenshe jaǵdaılar departamentine Jambyl aýdany, Úlgeli aýyldyq okrýgi mańynda 1950 jyly týǵan er adamnyń joǵalǵany týraly aqparat tústi.

«Qutqarýshylar dereý izdeýge jiberildi. Shopanǵa uıaly telefon arqyly habarlasqannan keıin onyń shamamen ornalasqan jeri anyqtaldy. 24 aqpan tańǵy saǵat 06:05-te adasyp ketken adamdy qutqarýshylar Aıdarly aýylynan 25 shaqyrym jerden tapty», - dep habarlady Almaty oblysy Tótenshe jaǵdaılar departamentiniń baspasóz qyzmetinen.