Almaty oblysynda jyl basynan beri 9 adam sýǵa batyp ketken

QONAEV. KAZINFORM — Shomylý maýsymy kezinde qaıǵyly oqıǵalardyń aldyn alý úshin keshendi is-sharalar jurgizilip jatyr.

Almaty oblysy Tótenshe jaǵdaılardy joıý basqarmasynyń bastyǵy Samat Kenjehannyń aıtýynsha, jyl basynan beri 9 adamnyń sýǵa batý deregi tirkelgen. Sondyqtan sý aıdyndarynda qaýipsizdik kúsheıtilgen. Jalpy óńirde 103 ruqsat etilgen jaǵajaı bar. Al qaýipti 87 ýchaskege 200-den astam qaýipsizdik belgisi ornatylǵan.

— Qutqarýshylar men volonterler kúndelikti reıd júrgizip jatyr. Sonymen qatar Qapshaǵaı sý qoımasynda qaýipsizdikti qashyqtyqtan baqylaýǵa arnalǵan monıtorıng júıesi ornatylǵan, jedel áreket etý úshin 31 júzý quraly men 45 súńgýir jabdyǵy daıyndalǵan. Jyl basynan beri QR Ákimshilik quqyqbuzýshylyq týraly kodekstiń 412-baby boıynsha 93 azamat jaýapqa tartylyp, 1 mln 418 myń teńgeden astam aıyppul salyndy, — dedi Samat Kenjehan.

Al Tótenshe jaǵdaılardy aldyn alý basqarma bastyǵynyń m. a. Qyrǵyz Ernazar sońǵy ýaqytta balalardyń terezeden qulaý faktisi jıilegen atap ótti.

Qonaev qalasynda — 2, Qarasaı aýdanynda — 1 bala bıikten qulap, aýyr jaraqatpen aýrýhanaǵa jetkizilgen.

— Qaýipsizdikti arttyrý maqsatynda túsindirý jumystary júrgizilip jatyr. Sonymen qatar «Qaýipsiz tereze» aktsııasy aıasynda joǵary qabatta páteri bar kópbalaly jáne áleýmettik az qamtylǵan otbasylardyń terezelerine arnaıy bekitpeler ornatylyp jatyr», — dedi Qyrǵyz Ernazar.

Eske salaıyq, buǵan deıin Qapshaǵaıda depýtattyń kóz aldynda jas qyz sýǵa batyp ketkenin jazǵanbyz.