Almaty oblysynda jyl basynan beri 52 myńnan asa jumys orny ashyldy
QONAEV. KAZINFORM — Almaty oblysynda bıyl 52 500 jańa jumys orny ashyldy.
Almaty oblysy jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Janserik Ádıahmetovtiń aıtýynsha, bıyl 66 myń jańa jumys ornyn qurý josparlanǵan, onyń 76,6%-y turaqty jumys oryndary.
«Jyl basynan beri oblysta 52,5 myń jumys orny ashyldy, onyń 39,7 myńy turaqty. Sýbsıdııalanatyn jumys oryndaryna 11,8 myń adam jiberildi. Olardyń qatarynda jastar tájirıbesinen ótken 971 adam, qoǵamdyq jumystarda 8 153 adam jáne áleýmettik jumys oryndarynda 601 adam bar. Sonymen qatar, «Kúmis jas» jobasy arqyly 1 442 azamat jumysqa turdy», — dedi Janserik Ádıahmetov.
Qysqa merzimdi kýrstar arqyly 624 jumyssyz azamat kásibı daǵdylaryn jetildirdi. «Bastaý bıznes» baǵdarlamasy boıynsha 2,9 myń adam oqyp, óz kásipterin bastaý múmkindigine ıe boldy.
«Jumyspen qamtýǵa járdemdesý maqsatynda jyl basynan beri 69 jumys jármeńkesi uıymdastyrlydy. 279 adam, onyń ishinde bas bostandyǵynan aıyrý oryndarynan bosap shyqqan 54 azamat pen probatsııa qyzmetinde esepte turǵan 225 adam járdemdesý sharalaryna júgindi. Olardyń 224-i turaqty jumysqa ornalastyryldy, al 17-si qoǵamdyq jumystarǵa jiberildi», — dedi spıker.
Múgedektigi bar azamattarǵa arnalǵan arnaıy qoldaý sharalary da júzege asyrylyp jatyr. Oblysta 97 kásiporynǵa 166 jumys ornyna kvota belgilenip, jyl basynan beri 1 143 múgedektigi bar azamattyń 487-si turaqty jumysqa ornalasty.
