Almaty oblysynda JI zańsyz kóshi-qon derekterin anyqtaýǵa kómektesti
ASTANA. KAZINFORM – Almaty oblysynda jasandy ıntellekt tehnologııalary arqyly kóshi-qon zańnamasyn buzý derekteri anyqtaldy.
Almaty oblysynyń prokýrory Berik Adamovtyń tóraǵalyǵymen kóshi-qon zańnamasynyń saqtalýyna arnalǵan Úılestirý keńesiniń otyrysy ótti.
Jıynda prokýrorlyq qadaǵalaýdy tsıfrlandyrý maqsatynda jasandy ıntellekt pen úlken derekterdi taldaý tehnologııalary negizinde ázirlengen «Dala-Cloud» aqparattyq-taldamalyq júıesi tanystyryldy.
Atalǵan júıe memlekettik aqparattyq resýrstardaǵy derekterdi avtomatty túrde taldap, táýekel ındıkatorlaryn anyqtaıdy. Bul kóshi-qon zańnamasyn buzýdyń júıeli faktilerin ýaqtyly anyqtaýǵa múmkindik beredi.
– «Dala-Cloud» júıesiniń kómegimen 159 myńnan astam shetel azamaty jáne 30 myńnan astam ákimshilik materıal boıynsha málimetter taldandy. Nátıjesinde ákimshilik quqyq buzýshylyqtardy durys saralamaýdyń 287 faktisi, jumys berýshilerge qatysty shara qoldanbaýdyń 61 jaǵdaıy, sheteldik jumys kúshin zańsyz paıdalanýdyń 11 faktisi anyqtaldy, – dep habarlady prokýratýradan.
Sondaı-aq júıe elden shyǵaryp jiberý týraly sot aktileriniń oryndalmaýynyń 12 faktisin, turǵyn úı ıeleriniń kelisiminsiz shetel azamattaryn tirkeýdiń 5 deregin jáne basqa da zań buzýshylyqtardy anyqtaǵan.
Otyrys qorytyndysynda oblys prokýrory Berik Adamov tsıfrlyq sheshimderdi engizý jáne memlekettik organdardyń tıimdi ózara is-qımyly kóshi-qon zańnamasy talaptarynyń buzylýyn anyqtaýǵa, jolyn kesýge jáne aldyn alýǵa múmkindik beretinin atap ótti.
Aıta keteıik, jyl basynan beri kóshi-qon zańnamasyn buzǵan 100 quqyq buzýshy ustaldy.
