Almaty oblysynda jeti zańsyz qurylys anyqtaldy
QONAEV. KAZINFORM – Jyl basynan beri Almaty oblysynda monıtorıng toptar ruqsat qujattary joq jeti nysandy anyqtady. Jınalǵan materıaldar sotqa joldandy.

Almaty oblysy Memlekettik cáýlet-qurylys baqylaý basqarmasynan atap ótkendeı, jergilikti turǵyndar zańsyz qurylystardyń kóbeıip bara jatqanyn jáne olar eldi mekenderdiń kórkin buzyp, ómir súrý sapasyna keri áserin tıgizip otyrǵanyn aıtqan.

– Zańsyz qurylys – tek zań buzýshylyq qana emes, turǵyndar qaýipsizdigine tónetin qater jáne qorshaǵan ortaǵa zııan. Biz bul máselege nemquraıly qaramaımyz jáne óz betinshe qurylys salýdyń kez kelgen áreketin qatań toqtatamyz, – dedi Almaty oblysy Memlekettik sáýlet-qurylys baqylaý basqarmasy bastyǵynyń mindetin atqarýshy Ǵabıden Úzenbaev.
Aıtýynsha, Memlekettik sáýlet-qurylys baqylaý basqarmasy tekserý jumystary jalǵasady.

– Zań buzýshylar aıyppul tóleıdi, al zańsyz qurylystar buzylady. Aıta keteıik, tek sońǵy aıdyń ózinde qurylys salasyndaǵy zań buzýshylyqtar úshin 8 843 324 teńge kóleminde aıyppul salyndy, – dedi ol.
Eske salaıyq, byltyr Almaty oblysynda 23 zańsyz qurylystyń isi sotqa joldanǵan bolatyn.