Almaty oblysynda jeńil kólik jaıaý júrginshini qaǵyp, mert qyldy
QONAEV. KAZINFORM — Almaty-Bishkek avtojolynda adam ólimine ákelgen jol apaty boldy.
Almaty oblysy Polıtsııa departamentiniń málimetinshe, 20 qańtar kúni Almaty-Bishkek avtojolynyń 38 shaqyrymynda Mercedes-Benz kóliginiń júrgizýshisi jaıaý júrginshiler ótkelinen ótip bara jatqan adamdy qaǵyp ketken.
— Alǵan jaraqattarynan er adam oqıǵa ornynda qaıtys boldy. Jol-kólik oqıǵa faktisi boıynsha tergeý jumystary júrip jatyr, — dep habarlady oblystyq PD baspasóz qyzmeti.
Sonymen qatar, óńirlik polıtsııa barlyq júrgizýshilerdi QR jol qozǵalysy erejelerin qatań saqtaýǵa, jolda erekshe qyraǵylyq tanytýǵa, ásirese jaıaý júrginshiler ótkelderine jaqyndaǵanda muqııat bolyp, jyldamdyqty azaıtýǵa jáne kez kelgen ýaqytta toqtaýǵa daıyn bolýǵa shaqyrdy.
Eske salaıyq, birneshe kún buryn Almatyda jol apatynan 39 jastaǵy áıel mert bolǵanyn jazǵanbyz.