Almaty oblysynda jeke sot oryndaýshylary qumar oıyndarǵa 180 mln teńge qarjy jumsaǵan
ASTANA. KAZINFORM — Almaty oblysynda 20 jeke sot oryndaýshysynyń býkmekerlik keńselerde qumar oıyndarǵa turaqty qatysqany anyqtaldy.
Olar oıyn shottaryn júıeli túrde tolyqtyryp otyrǵan. Aýdarylǵan qarajattyń jalpy kólemi 180 mln teńgege jýyqtaǵan.
Tekserý barysynda jeke sot oryndaýshylarynyń biri úsh jyl ishinde oıyn shotyna 139 mln teńge aýdarǵany anyqtaldy. Taǵy biriniń osy maqsatqa jumsaǵan qarajaty 26 mln teńgege jetken.
— Mańyzdy fýnktsııalardy júzege asyratyn tulǵalardyń osyndaı kólemdegi qarajatpen qumar oıyndarǵa qatysýy kásibı ádep qaǵıdattaryna qaıshy keledi jáne qoǵamnyń jeke sot oryndaýshylary ınstıtýtyna degen senimine kesirin tıgizedi, — dep habarlady Almaty oblysynyń prokýratýrasy.
Anyqtalǵan faktiler boıynsha prokýrorlyq qadaǵalaý aktileri Almaty oblysynyń Ádilet departamenti men Jeke sot oryndaýshylarynyń óńirlik palatasyna joldandy. Quzyrly organdar aldynda zańda kózdelgen sharalardy qabyldaý máselesi kóterildi.
Eske salaıyq, buǵan deıin qumar oıynǵa salynǵan atyraýlyq áskerı qyzmetshi kórshisin aldaǵany úshin sottalǵanyn habarlaǵanbyz.
