Almaty oblysynda jataqhanasy syn kótermeıtin birneshe kolledj anyqtaldy
ALMATY. KAZINFORM — Amanat partııasynyń belsendileri Qarasaı aýdanynyń ortalyǵynda ornalasqan birqatar kolledj jataqhanasyn tekserdi. Birinde ınternet qosylmasa, endi birinde stýdentter eski-qusqy kórpe-jastyq jastanyp jatyr.
Partııanyń Almaty oblystyq fılıaly málimetinshe, partııa belsendileri 1986 jyly paıdalanýǵa berilgen Sanjar Jandosov atyndaǵy Qaskeleń kásiptik tehnıkalyq kolledjine manıtorıng júrgizdi. 300 orynǵa shaqtalǵan stýdentter úıi 38 jylǵa jýyq ýaqyttan beri kúrdeli jóndeýden ótpegen. Búginde munda 50-ge tarta stýdent turady.
«7 mamandyq boıynsha 600-ge tarta shákirtke kásiptik bilim berip otyrǵan irgeli mekemeniń jáı-kúıi syn kótermeıdi. Jataqhana qabyrǵalarynyń sylaǵy túsip, as úı men tazalyq bólmeleriniń tozyǵy jetip tur. Sý júıeleriniń de jaǵdaıy tym nashar. Oǵan qosa qalanyń qaq ortasynda turyp ınternet jelisine qosylmaǵan», – deıdi Almaty oblystyq máslıhat depýtaty Ásel Zaırova.
Al kolledj dırektorynyń aıtýynsha, bilim ordasynda ınternet bar, tek jyldamdyǵy nashar.
«Internettiń jyldamdyǵy tómen. Sondyqtan ashylmaı turǵan shyǵar. Al bylaı ınternet bar. Materııaldyq baza da bári bar. Biraq jańartýdy qajet etedi. Ǵımaratty kúrdeli jóndeýden ótkizýge kópten beri ótinim berip kelemiz. Alaıda, qarjy qarastyrylmaı jatyr», – deıdi kolledj dırektory Rýstembek Bákirov.
Sondaı- aq monıtornıg toby Qaskeleń mádenıet kolledjine de bardy. Mundaǵy stýdentter úıi 55 jyl buryn salynǵan. 2014 jyly kúrdeli jóndeýden ótken. Alaıda, elektr júıesinde qaýipsizdik talaptary saqtalmaǵan.
«Stýdentter las tósenishterdi qoldanýǵa májbúr. Biz barǵan qos mekemeniń múshkil jaǵdaıy kópten beri aıtylyp, kóterilip keledi. Bilim basqarmasyna depýtattyq saýal da joldanǵan bolatyn. Ókinishke qaraı jaýap áli kúnge deıin joq», – deıdi amanattyq depýtat.
Partııa ókilderiniń aıtýynsha, aldaǵy ýaqytta óńirdegi barlyq orta arnaıy oqý oryndaryndaǵy jataqhanalar tekseriledi.
