Almaty oblysynda jasóspirim basqarǵan kólik aǵashqa soqtyǵysyp, 3 oqýshy mert boldy

QONAEV. KAZINFORM — Jol-kólik oqıǵasy 27 mamyr kúni saǵat 04:20 shamasynda bolǵan.

Almaty oblysy polıtsııa departamentiniń málimetinshe, Tóńkeris — Baıserke — Qaraoı avtojolynyń 44-shaqyrymynda Mitsubishi Galant markaly avtokólikti basqarǵan kámeletke tolmaǵan júrgizýshi kólik tizginine ıe bola almaı, aǵashqa soqtyǵysqan.

Jol-kólik oqıǵasy saldarynan júrgizýshi men jolaýshylardyń biri oqıǵa ornynda qaza tapty. Taǵy eki jábirlenýshi medıtsınalyq mekemege jetkizilgen, alaıda dárigerlerdiń kúsh-jigerine qaramastan, olardyń biri qaıtys boldy.

— Atalǵan fakt boıynsha qylmystyq is qozǵalyp, sotqa deıingi tergeý amaldary júrgizilip jatyr. Oqıǵanyń barlyq mán-jaıyn anyqtaý maqsatynda qajetti saraptamalar taǵaıyndaldy. Barlyq jaǵdaı anyqtalǵannan keıin, zańdy ókilderge qatysty da qoldanystaǵy zańnama aıasynda sheshim qabyldanatyn bolady, — dep habarlady departamentten.

Tártip saqshylary ata-analardy jol-kólik oqıǵalarynyń aldyn alý úshin balalarǵa túsindirý jumystaryn turaqty túrde júrgizýge shaqyrdy.

Eske salaıyq, birneshe kún buryn Almaty oblysynda oqýshy óz synyptasyn óltirdi degen kúdikke ilindi.